शिरुरमधील इनामगावात भागातील घटना
marathinews24.com
पुणे – शेततळ्यात बुडून दोन वर्षांच्या बालकाचा मृत्यू झाल्याची घटना शिरुरमधील इनामगावात मंगळवारी घडली. सार्थक आकाश आमले (वय ३) असे मृत्यूमुखी पडलेल्या बालकाचे नाव आहे. याबाबत त्याचे वडील आकाश नामदेव आमले (वय २७ सध्या रा. नांदेमळा, इनामगाव, ता. शिरुर, जि. पुणे, मूळ रा. मोहापूर, ता. किनवट, जि. नांदेड) यांनी शिरुर पोलीस ठाण्यात तक्रार दिली आहे.
‘मोक्का’ कारवाईनंतर पोलिसांना गुंगारा देणारा अटकेत – सविस्तर बातमी
पोलिसांनी दिलेल्या माहितीनुसार, आकाश आमले आणि त्यांची पत्नी निकिता हे मजुरी करतात. ते मूळचे नांदेड जिल्ह्यातील मोहापूर गावचे रहिवासी आहेत. त्यांना सार्थक नावाचा तीन वर्षांचा मुलगा आहे. मंगळवारी (३० जून) दुपारी साडेतीनच्या सुमारास आमले दाम्पत्यासह दहा ते बारा मजूर संजय सातव यांच्या केळीच्या बागेत काम करत होते. कामावर त्यांनी तीन वर्षांचा मुलगा सार्थक याला आणले होते. सातव यांच्या केळीच्या बागेत शेततळे आहे. आमले दाम्पत्याने मुलगा सार्थक याला मोबाइल संच खेळण्यासाठी दिला होता. सार्थक शेततळ्यापासून काही अंतरावर होता. काही वेळानंतर मोबाइलवरल लावलेल्या गाण्यांचा आवाज बंद झाल्याने आकाश आणि त्यांची पत्नी निकिता यांनी सार्थकला पाहिले. तेव्हा सार्थक तेथे नव्हता. तो बेपत्ता झाल्याचे लक्षात आल्यानंतर संजय सातव आणि ग्रामस्थांना याबाबतची माहिती दिली.
सार्थकचा शोध घेण्यात आला. तेव्हा सार्थक हा शेततळ्यात बुडाल्याचे लत्रात आले. गावातील तरुणांनी शेततळ्यात बुडालेल्या सार्थकला बाहेर काढले. त्याला तातडीने मांडवगण फराटा येथील शासकीय रुग्णालयात दाखल करण्यात आले. सार्थकचा उपचारांपूर्वीच मृत्यू झाल्याचे वैद्यकीय तज्ज्ञांनी सांगितले. या प्रकरणी अकस्मात मृत्यू अशी नोंद करण्यात आली असून, पोलीस हवालदार खबाले तपास करत आहेत.
