बुलेटसह ११ दुचाकी जप्त
marathinews24.com
पुणे – सायलेन्सरमधून फटाक्यासारखा आवाज काढणाऱ्या बुलेट चालकांविरुद्ध हडपसरमधील काळेपडळ पोलिसांनी कारवाईचा बडगा उगारला. रात्री अपरात्री फटाक्याच्या आवाज काढणाऱ्या बुलेट चालकांच्या त्रासामुळे नागरिक हैराण झाले होते. पोलिसांनी बुलेट, तसेच दुचाकी चालकांविरुद्ध थेट गुन्हे दाखल करुन ११ दुचाकी जप्त केल्या.
कौटुंबिक वादातून तरुणाची इमारतीवरून उडी; अमनोरा सोसायटीत खळबळ – सविस्तर बातमी
काळेपडळ परिसरातील कडनगर चौक, महंमदवाडी, उंड्री, रहेजा व्हिस्टा चौक परिसरात रात्री अपरात्री भरधाव दुचाकी, बुलेट चालक जात असून फटाक्यासारखे आवाज काढण्यात येत असल्याची तक्रार नागरिकांनी पोलिसांकडे केली होती.
सायलेन्सरमधून फटाक्यासारख्या आवाज काढणाऱ्या दुचाकीस्वार, बुलेट चालकांविरुद्ध कारवाई करण्यासाठी विशेष पथक नेमण्यात आले होते. सहायक पोलीस फौजदार राजस शेख, हवालदार प्रवीण काळभोर, महादेव शिंदे, गिरीराज जगदाळे यांनी बुलेट चालक, तसेच दुचाकीस्वारांविरुद्ध कारवाई केली. या कारवाईत पोलिसांनी बुुलेटसह ११ दुचाकी जप्त केल्या. मोटार वाहन कायदा, सार्वजनिक शांततेता भंग करणे, केंद्रीय मोटार वाहन कायदा कलम १२० अन्वये १८ जणांविरुद्ध गुन्हा दाखल करण्यात आला.
परिमंडळ सहाचे पोलीस उपायुक्त जीवन बेनीवाल यांच्या मार्गदर्शनाखाली वरिष्ठ पोलीस निरीक्षक गिरीषा निंबाळकर, गु्न्हे शाखेचे पोलीस निरीक्षक अण्णासाहेब बाबर, सहायक निरीक्षक विलास सुतार, राजस शेख, प्रवीण काळभोर, अमोल फडतरे, नीलेश देसाई, दाऊद सय्यद, प्रतीक लाहीगुडे, शाहिद शेख, अतुल पंधरकर, नितीन ढोले, विशाल ठोंबरे यांनी ही कारवाई केली.
