बनावट ओळखपत्र, गणवेश जप्त
marathinews24.com
पुणे – हवाई दलातील जवानासारखा गणवेश परिधान करुन वावरणाऱ्या एकाला पकडले. त्याच्याविरुद्ध लोहगाव पोलिसांनी गुन्हा दाखल करण्यात आला आहे. या प्रकरणात अटक करण्यात आलेल्या तरुणाकडून हवाई दलातील बनावट ओळखपत्र आणि गणवेश जप्त करण्यात आला आहे. याप्रकरणी शुभम विलास अंबुरे (वय २६, सध्या रा. स्वप्ननगरी सोसायटी, शिक्रापूर रस्ता, ता. शिरुर, जि. पुणे) याला अटक करण्यात आली आहे. हवाई दलातील जवान ब्रिजेशकुमार मिश्रा (वय ४८) यांनी लोहगाव पोलीस ठाण्यात फिर्याद दिली आहे.
सराईत चौघे पुणे जिल्ह्यातून तडीपार; वाघोली पोलिसांची कारवाई – सविस्तर बातमी
पोलिसांनी दिलेल्या माहितीनुसार, अंबुरेने लोहगावमधील गुरुद्वारा रस्त्यावरील एका टेलरिंग दुकानातून हवाई दलातील जवानासारखा गणवेश शिवून घेतला होता. त्याने हवाई दलातील जवानाचे बनावट ओळखपत्र तयार करुन घेतले. बनावट ओळखपत्र बाळगून, तसेच हवाई दलातील जवानासारखा गणवेश परिधान करुन तो वावरत होता. याबाबत हवाई दलातील अधिकाऱ्यांना मिळाली. त्यानंतर सापळा लावून त्याला पकडण्यात आले. अंबुरेला पोलिसांच्या ताब्यात देण्यात आले.
अंबुरे यांच्याविरुद्ध गुन्हा दाखल करुन त्याला अटक करण्यात आली आहे. त्याने हवाई दलातील जवानासारखा गणवेश का परिधान केला, तसेच त्याने ओळखपत्र कसे तयार केले ? यादृष्टीने पोलिसांकडून तपास करण्यात येत आहे. वरिष्ठ पोलीस निरीक्षक मनीषा पाटील यांच्या मार्गदर्शनाखाली सहायक निरीक्षक शिंंदे तपास करत आहेत.
