मुंबईला पोहोचवण्याऐवजी वाकडच्या पुलाखाली उतरून पोबारा
marathinews24.com
पुणे – ग्राहकांचे ९० लाख ३३ हजार रुपये किमतीचे सोन्या-चांदीचे दागिने मुंबईला पोहोचवण्यासाठी घेऊन निघालेल्या कुरिअर बॉयनेच दागिने लंपास करून पोबारा केल्याचा धक्कादायक प्रकार समोर आला आहे. जितेंद्र ऋषिकेश सिंह यांनी याबाबत खडक पोलिस ठाण्यात फिर्याद दिली आहे. त्यानुसार विशाल सत्यपाल चौहान (वय २०, रा. उत्तर प्रदेश) याच्याविरोधात गुन्हा दाखल करण्यात आला आहे.
बनावट ट्रेडिंग प्लॅटफॉर्मवरून महिलेची ४९ लाखांची फसवणूक – सविस्तर बातमी
पोलिसांनी दिलेल्या माहितीनुसार, सिंह यांची घोरपडे पेठेतील राष्ट्रभूषण चौकात एस. जी. एल. जे. पी. लॉजिस्टिक प्रायव्हेट लिमिटेड नावाची कुरिअर कंपनी आहे. ग्राहकांचे पैसे, सोने-चांदीचे दागिने कुरिअरद्वारे पोहोचवण्याचे काम कंपनीकडून केले जाते. पुण्यासह सहा शहरांमध्ये कंपनीचे कामकाज आहे. चौहान हा कंपनीच्या मुंबई कार्यालयात कार्यरत होता.
५ ऑगस्ट रोजी विविध ग्राहकांचे ९० लाख ३३ हजार रुपये किमतीचे सोन्या-चांदीचे दागिने मुंबईला पोहोचवण्यासाठी चौहानकडे देण्यात आले होते. मात्र, मुंबई कार्यालयात दागिने जमा न करता तो पसार झाला. याप्रकरणी खडक पोलिस पुढील तपास करत आहेत.
मुंबईऐवजी वाकडला उतरला
फिर्यादी हे अनेक वर्षांपासून ग्राहकांचे सोने-चांदी कुरिअरद्वारे पोहोचवण्याचे काम करतात. त्यामुळे त्यांची बस वाहकांशी ओळख आहे. चौहान मुंबई कार्यालयात पोहोचला नसल्याचे समजल्यानंतर फिर्यादी यांनी बस वाहकाशी संपर्क साधला. त्यावेळी चौहान मुंबईला न जाता वाकड येथील पुलाखाली उतरल्याचे वाहकाने सांगितले.
