नराधमाला वारजे माळवाडी पोलिसांनी केले गजाआड
marathinews24.com
पुणे – तरुणीचा पाठलाग करुन तिला २० लाख रुपयांची खंडणी मागितल्याची घटना घडली असून, पैसे न दिल्याने आरोपीने तरुणीचे अश्लील फोटो सोशल मीडियावर व्हायरल केले. तिची बदनामी करणार्या नराधमाला वारजे माळवाडी पोलिसांनी अटक केली आहे. विजयसिंह संतोष गुंड (वय ३०, रा. मडेवडगाव (ढोकराई) ता. श्रीगोंदा, जि. अहिल्यानगर) असे अटक केलेल्या आरोपीचे नाव आहे. याप्रकरणी २४ वर्षीय तरुणीने वारजे माळवाडी पोलिस ठाण्यात फिर्याद दिली आहे. हा प्रकार २५ डिसेंबर २०२५ ते २२ मार्च २०२६ दरम्यान सुरु होता.
पुणे जिल्हा सहकारी बँकेत नोकरीच्या आमिषाने फसवणूक – सविस्तर बातमी
पोलिसांनी दिलेल्या माहितीनुसार, फिर्यादी तरुणी आणि विजयसिंह गुंड हे एकमेकांच्या ओळखीचे आहेत. विजयसिंह हा तरुणीचा पाठलाग करुन तिला त्रास देत होता. त्याने तिच्याकडे २० लाख रुपयांची खंडणी मागितली. पैसे न दिल्याने विजयसिंहने त्याच्यासोबत असलेले तरुणीचे अश्लील फोटो सोशल मीडियावर व्हायरल करुन खल्लास करेन, अशी धमकी दिली. तिच्या इच्छेविरूद्ध तिचा हात धरून स्वत:जवळ ओढले. सुरुवातीला तिने त्याच्या धमकीकडे दुर्लक्ष केले.
पैसे न दिल्याने विजयसिंहने गावाकडील ग्रुपवर तिचे अश्लील फोटो व्हायरल करुन बदनामी केली. ही बाब समजताच तरुणीने वारजे माळवाडी पोलिस ठाण्यात धाव घेतली. पोलिसांनी विजयसिंह गुंड याच्यावर पाळत ठेवून त्याला ताब्यात घेतले. तरुणीची फिर्याद घेऊन विजयसिंह गुंड याला अटक केली असून, पुढील तपास वरिष्ठ पोलिस निरीक्षक महेश बोळकोटगी करत आहेत.
