गोळीबार प्रकरणात दोघे अटकेत
marathinews24.com
पुणे – वादातून हाॅटेल चालकासह कामगारावर पिस्तुलातून गाेळीबार करण्यात आल्याची घटना वेल्हे तालुक्यातील कोदवडी फाटा परिसरात रविवारी रात्री घडली. हल्लेखोरांनी दोघांवर कोयत्याने वार केले. या घटनेत हाॅटेल मालकासह कामगार जखमी झाला. पसार झालेल्या दोघा आरोपींना पोलिसांनी अटक केली. याप्रकरणी वेल्हे पोलिसांनी हल्लेखाेरांविरुद्ध गुन्हा दाखल केला आहे. या घटनेत हाॅटेल मालक म्हस्कू तानाजी दसवडकर, कामगार दशरथ शिळीमकर जखमी झाले आहेत. त्यांच्यावर खासगी रुग्णालयात उपचार सुरू असून, त्यांची प्रकृती स्थिर आहे. या प्रकरणी ओंकार सुरेश इंगुळकर (वय १९), विशाल अप्पा इंगुळकर (वय २४, दोघे रा. सुरवड, ता. वेल्हे, जि. पुणे) यांना अटक करण्यात आली आहे.
गुंतवणुकीच्या आमिषाने व्यावसायिक महिलेची फसवणूक – सविस्तर बातमी
‘आरोपी इंगुळकर आणि साथीदारांचा चार ते पाच दिवसांपूर्वी कोदवडी फाटा परिसरातील हाॅटेल श्रीनाथचे मालक म्हस्कू दसवडकर यांच्याशी वाद झाला होता. रविवारी (२४ मे) रात्री दहाच्या सुमारास इंगुळकर आणि साथीदार हाॅटेलमध्ये शिरले. त्यांनी हाॅटेल मालक दसवडकर यांच्याशी वाद घालण्यास सुरुवात केली. आरोपींनी दसवडकर यांना पिस्तुलाचा धाक दाखविला. इंगुळकर यांच्यावर पिस्तूल रोखून हवेत गोळीबार केला. त्या वेळी हाॅटेलमधील कामगार यांनी शिळीमकर याने मध्यस्थी करण्याचा प्रयत्न केला. आरोपींनी दसवडकर आणि शिळीमकर यांच्यावर कोयत्याने वार केले. आरोपींनी केलेल्या हल्ल्यात दोघ जखमी झाले. या घटनेची माहिती मिळताच वेल्हे पोलिसांनी घटनास्थळी धाव घेतली. पसार झालेल्या दोघा आरोपींना ताब्यात घेण्यात आले. आरोपींबरोबर असलेल्या साथीदारांची नावे निष्पन्न झाली असून, त्यांचा शोध घेण्यात येत आहे’, अशी माहिती ग्रामीण पोलीस अधीक्षक संदीपसिंग गिल यांनी दिली.
