वाघोलीतील घटना
marathinews24.com
पुणे – चारित्र्याच्या संशयावरुन तरुणीचा खून करण्यात आल्याची घटना वाघोलीतील आव्हाळवाडी परिसरात घडली. याप्रकरणी एका तरुणाविरुद्ध गु्न्हा दाखल करण्यात आला असून, आरोपी पसार झाला आहे. रिहाना खातून (वय २६, सध्या रा. शिवलक्ष्मी बिल्डींग, आव्हाळवाडी रस्ता, वाघोली, मूळ रा. नोेंदईगाजन, भागनपूर, जि. मेदनपूर, पश्चिम बंगाल ) असे खून झालेल्या तरुणीचे नाव आहे. या प्रकरणी एका तरुणाविरुद्ध गु्न्हा दाखल करण्यात आला आहे. इम्रान राजेसाब बोदले खान (वय ३१, रा. आदर्शनगर, लोहगाव, मूळ रा. गदग, कर्नाटक) यांनी वाघोली पोलीस ठाण्यात फिर्याद दिली आहे.
गुन्ह्यात अडकविण्याची भीती दाखविल्याने तरुणाची आत्महत्या – सविस्तर बातमी
पोलिसांनी दिलेल्या माहितीनुसार, आरोपी आणि रिहाना हे विवाह न करता वाघोलीत एकत्र राहत होते. दोघे जण पती, पत्नी असल्याचे भासवत होते. गेल्या काही महिन्यांपासून आरोपी रिहानाच्या चारित्र्याचा संशय घेत होता. या कारणावरुन त्यांच्यात वाद व्हायचे. २८ मे रोजी त्यांच्यात वादावादी झाली. आरोपीने रिहानाला मारहाण करुन तिचा खून केला. त्यानंत घराला कुलूप लावून आरोपी पसार झाला.
आरोपी राहत घरात असलेल्या घरातून दुर्गंधी येत असल्याची तक्रार रहिवाशांनी पोलिसांकडे दिली. पोलिसांनी घराचे कुलूप तोडले. तेव्हा रिहाना मृतावस्थेत सापडली. या घटनेची माहिती मिळताच परिमंडळ सातचे पोलीस उपायुक्त डाॅ. प्रशांत अमृतकर, सहायक आयुक्त नूतन पवार, वरिष्ठ पोलीस निरीक्षक नंदकुमार गायकवाड यांनी घटनास्थळी भेट दिली. पसार झालेल्या आरोपीचा शोध घेण्यात येत असून, गुन्हे शाखेचे पोलीस निरीक्षक विजय चंदन तपास करत आहेत.
