चोरट्यांविरुद्ध गुन्हा दाखल
marathinews24.com
पुणे – शहरातील मुंढवा भागात एका सोसायटीत असलेल्या सदनिकेतून चोरट्यांनी रोकड, तसेच सोन्याचे दागिने असा पाच लाख १५ हजार रुपयांचा ऐवज लांबविल्याची घटना घडली. या प्रकरणी चोरट्यांविरुद्ध गुन्हा दाखल करण्यात आला आहे. याबाबत एका तरुणाने मुंढवा पोलीस ठाण्यात फिर्याद दिली आहे.
केज तालुक्यात वादळीवाऱ्यासह पावसाचा हाहाकार, झाड कोसळून एकाचा मृत्यू – सविस्तर बातमी
पोलिसांनी दिलेल्या माहितीनुसार, तक्रारदार तरुण कुटुंबीयांसह मुंढव्यातील बाॅन विवांत सोसायटीत राहायला आहेत. सदनिकेचा दरवाजा उघडा असल्याची संधी चोरट्याने साधली. शयनगृहातील कपाटातून चोरट्याने पाच हजारांची रोकड, तसेच सोन्याचे दागिने असा पाच लाख १५ हजार रुपयांचा ऐवज लांबविला. सदनिकेत चोरी करणारा चोरटा माहितगार असल्याचा संशय पोलिसांनी व्यक्त केला आहे. पोलीस उपनिरीक्षक युवराज पोमण तपास करत आहेत.
वसतिगृहातून लॅपटाॅप चोरी
बालेवाडीतील एका खासगी वसतिगृहातून (पीजी) चोरट्यांनी २ लॅपटाॅप, मनगटी घड्याळ, मोबाइल संच असा मु्द्देमाल चोरुन नेल्याची घटना घडली. याबाबत एका तरुणाने बाणेर पोलीस ठाण्यात फिर्याद दिली आहे. पोलिसांनी दिलेल्या माहितीनुसार, तक्रारदार तरुण हा बालेवाडीतील झोलो पीजी या खासगी वसतिगृहात राहायला आहे. चोरट्यांनी वसतिगृहातून २ लॅपटाॅप, एक मनगटी घड्याळ, लॅपटाॅप बॅग, मोबाइल संच, पेनड्राईव्ह असा मुद्देमाल चोरुन नेला. पोलीस हवालदार निकाळजे तपास करत आहेत.
