लोहियानगरमध्ये अल्पवयीनावर गोळीबार; गुंडासह तीन अल्पवयीन साथीदार ताब्यात
marathinews24.com
पुणे – शहरातील लोहियानगर भागात अल्पवयीनावर गोळीबार करणाऱ्या गुंडाला खडक पोलिसांनी अटक केली. आरोपीबरोबर असलेल्या तीन अल्पवयीनांना ताब्यात घेण्यात आले आहेत.अभिषेक उर्फ बाप्पा अपूर्गा कसबे (वय ३१, रा. पीएमसी काॅलनी, घोरपडे पेठ) असे अटक करण्यात आलेल्याचे नाव आहे. या प्रकरणी कसबे याच्याबरोबर असलेल्या तीन अल्पवयीनांना ताब्यात घेण्यात आले आहे. याबाबत एका अल्पवयीनाने खडक पोलीस ठाण्यात फिर्याद दिली आहे.
पुण्यात प्रेम प्रकरणातून अल्पवयीनाचा खून – सविस्तर बातमी
पोलिसांनी दिलेल्या माहितीनुसार, आरोपी कसबे याच्याविरुद्ध खुनाचा प्रयत्न, बेकायदा शस्त्र बाळगणे, दहशत माजविणे असे गंभीर स्वरुपाचे गुन्हे दाखल आहेत. कसबे याचा तक्रारदार अल्पवयीनाशी वाद झाला होता. लोहियानगरमधील बाबू मामडी चौकात अल्पवयीन शुक्रवारी (२४ जुलै) सायंकाळी साडेपाचच्या सुमारास थांबला होता. त्या वेळी आरोपी कसबे आणि अल्पवयीन साथीदार तेथे आले. ‘माझ्याविरुद्ध दिलेली तक्रार मागे घे. माझ्या वडिलांनी तुला जीवे मारुन टाकायला सांगितले आहे’, अशी धमकी देऊन आरोपीने अल्पवयीनावर पिस्तूल राेखले. अल्पवयीनाच्या दिशेने आरोपीने पिस्तुलातून गोळीबार केला. त्यानंतर आरोपीने परिसरात दहशत माजविली. पसार झालेल्या कसबे याच्यासह साथीदारांना रात्री उशीरा ताब्यात घेतले. सहायक पोलीस निरीक्षक अमोल वळसंग तपास करत आहेत.
