५५ लाखांचा अपहार प्रकरणी गुन्हा दाखल
marathinews24.com
पुणे – महिला सक्षमीकरण, तसेच विकासासाठी काम करणाऱ्या शहरातील एका नामवंत स्वयंसेवी संस्थेतील लिपिकाने विद्यार्थिनींना दिल्या जाणऱ्या शिष्यवृत्तीचा अपहार केल्याची धक्कादायक घटना उघडकीस आली आहे. याप्रकरणी शिवाजीनगर पोलिसांनी लिपिकाविरुद्ध गुन्हा दाखल केला आहे. स्वयंसेवी संस्थेच्या संचालक अपर्णा गिरीश केळकर (वय ७२, रा. माॅडेल काॅलनी, शिवाजीनगर) यांनी शिवाजीनगर पोलीस ठाण्यात फिर्याद दिली आहे. त्यानुसार अक्षय विजय कुलकर्णी (रा. प्राधिकरण, निगडी) याच्याविरुद्ध गुन्हा दाखल करण्यात आला आहे.
तब्बल २ हजार ४०० किलो गांजा नष्ट – सविस्तर बातमी
पोलिसांनी दिलेल्या माहितीनुसार, स्वाधार ही संस्था महिला सक्षमीकरण आणि बालविकास क्षेत्रात काम करते. या संस्थेकडून गुणवंत विद्यार्थिनींना शिष्यवृत्ती देण्यात येते. कुलकर्णी याच्याकडे बँक व्यवहार, तसेच हिशेबाची जबाबदारी होती. शिष्यवृत्तीची रक्कम विद्यार्थिनींच्या खात्यात जमा केली जाते. ऑनलाइन पद्धतीने बँकेकडून ही रक्कम जमा करण्यात येते. आरोपीने बँकेकडे विद्यार्थिनीची यादी बँकेकडे सादर केली. या यादीत त्याने फेरफार केला. ही रक्कम त्यांनी स्वत:च्या खात्यात जमा करुन घेतली.
२४ जून २०२१ ते ३१ डिसेंबर २०२४ या कालवाधीत कुलकर्णी याने यादीत फेरफार करुन ५४ लाख ९८ हजार रुपयांचा अपहार केला. लेखापरीक्षणात हा प्रकार उघडकीस आल्यानंतर पोलिसांकडे तक्रार देण्यात आली. वरिष्ठ पोलीस निरीक्षक गिरीशकुमार दिघावकर यांच्या मार्गदर्शनाखाली या प्रकरणाचा तपास करण्यात येत आहे.
