चांगल्या परताव्याचे आश्वासन देत निवृत्त व्यक्तीला गंडा
marathinews24.com
पुणे – खासगी शिकवणीत गुंतवणुकीचे आमिष एका ज्येष्ठ नागरिकाची साडेपंधरा लाख रुपयांची फसवणूक करण्यात आल्याचा प्रकार उघडकीस आला. या प्रकरणी विश्रामबाग पोलिसांनी शिकवणी चालकाविरुद्ध गुन्हा दाखल केला. याबाबत ज्येष्ठ नागरिकाने फिर्याद दिली आहे. त्यांनी दिलेल्या फिर्यादीनुसार, लातूर पॅटर्न या खासगी शिकवणी वर्गाचे चालक विष्णू धोडींराम बिराजदार यांच्याविरुद्ध गुन्हा दाखल करण्यात आला आहे.
पानपट्टीवर धक्का लागल्याने तरुणाचा खुनाचा प्रयत्न – सविस्तर बातमी
पोलिसांनी दिलेल्या माहितीनुसार, तक्रारदार ७० वर्षीय ज्येष्ठ नागरिक पिंपरी-चिंचवडमधील ताथवडे परिसरात राहायला आहेत. ते सेवानिवृत्त आहेत. बिराजदार यांची ज्येष्ठ नागरिकाशी २०२१ मध्ये ओळख झाली होती. शिकवणी वर्गात गुंतवणूक केल्यास चांगला परतावा मिळेल, असे आमिष आरोपीने त्यांना दाखविले. त्यानंतर त्यांच्याकडून वेळोवेळी साडेपंधरा लाख रुपये घेतले. पैसे घेतल्यानंतर त्यांना परतावा दिला नाही. परताव्याबाबत विचारणा केल्यानंतर टाळाटाळ केली. फसवणूक झाल्याचे लक्षात आल्यानंतर त्यांनी नुकतीच पोलिसांकडे तक्रार दिली. पोलीस उपनिरीक्षक भंडारे तपास करत आहेत.
