‘एसआयआर फाॅर्म’मध्ये चूक झाल्याची बतावणी
marathinews24.com
पुणे – मतदार यादी दुरुस्ती अर्जात (एसआयआर फाॅर्म) चूक झाल्याची बतावणी करुन सायबर चोरट्यांनी एका ज्येष्ठ नागरिकाची ४ लाख ४३ हजार रुपयांची फसवणूक केल्याची घटना उघडकीस आली. या प्रकरणी सायबर चोरट्यांविरुद्ध अलंकार पोलिसांनी गुन्हा दाखल केला आहे. याबाबत एका ज्येष्ठ नागरिकाने अलंकार पोलीस ठाण्यात फिर्याद दिली आहे.
केंद्रीय अर्थमंत्र्यांच्या ‘डीपफेक व्हिडीओद्वारे फसवणुक – सविस्तर बातमी
पोलिसांनी दिलेल्या माहितीनुसार, तक्रारदार ज्येष्ठ नागरिक हे कर्वेनगरमधील नवसह्याद्री सोसायटीत राहायला आहेत. ते एका खासगी कंपनीतून निवृत्त झाले आहेत. सायबर चोरट्यांनी त्यांच्या मोबाइल क्रमांकावर ३० जुलै रोजी संपर्क साधला. ‘मतदार यादी दुरुस्तीचे काम सुरू असून, तुम्ही भरलेल्या मतदार यादी दुरुस्ती अर्जात चूक झाली आहे’, असा संदेश सायबर चोरट्यांनी त्यांच्या मोबाइल क्रमांकावर पाठविला होता. त्यानंतर सायबर चोरट्यांनी त्यांच्या मोबाइल क्रमांकावर समाज माध्यमातून एक फाॅर्म पाठविला. ‘या फाॅर्मसाठी पाच रुपये भरावे लागतील’, असे सांगून चोरट्यांनी त्यांना एपीके फाईल पाठविली. एपीके फाईलमध्ये बँक खात्याची माहिती भरावी लागेल, असे त्यांना सांगण्यात आले. त्यांनी एपीके फाईलमध्ये बँक खाते क्रमांक, तसेच अन्य माहिती भरल्यानंतर सायबर चोरट्यांनी त्यांचा मोबाइल क्रमांकाचा तांत्रिक ताबा घेतला.
सायबर चोरट्यांनी त्यांच्या बँक खात्यातून चार लाख ४३ हजार रुपये काढून घेतले. खात्यातून काढण्यात आलेली रक्कम दुसऱ्या खात्यात जमा केली. खात्यातून रक्कम काढण्यात आल्यानंतर त्यांनी पोलिसांकडे तक्रार दिली. या प्रकरणाचा तांत्रिक तपास करण्यात येत आहे. सायबर चोरट्यांनी ज्या खात्यात पैसे वळविले. त्या खात्याची माहिती घेण्यात येत आहे. पोलीस निरीक्षक स्मिता पाटील तपास करत आहेत.
