विमा पॉलिसीची रक्कम परत मिळवून देण्याचे आमिष; ज्येष्ठाला २८.३८ लाखांचा गंडा
marathinews24.com
पुणे – आयुर्विमा पाॅलिसीचे पैसे मिळवून देण्याच्या आमिषाने सायबर चोरट्यांनी एका ज्येष्ठ नागरिकाची २८ लाख ३८ हजार रुपयांची फसवणूक केल्याचा प्रकार उघडकीस आला. याप्रकरणी सायबर चोरट्यांविरुद्ध पोलिसांनी गुन्हा दाखल केला. याबाबत एका ज्येष्ठ नागरिकाने भारती विद्यापीठ पोलीस ठाण्यात फिर्याद दिली आहे.
सिंहगड रस्ता भागात भरदिवसा घरफोडी – सविस्तर बातमी
पोलिसांनी दिलेल्या माहितीनुसार, तक्रारदार ६३ वर्षीय ज्येष्ठ नागरिक हे आंबेगाव परिसरात राहायला आहेत. त्यांनी आयुर्विमा पाॅलिसी काढली होती. गेल्या वर्षी फेब्रुवारी महिन्यात सायबर चोरट्यांनी त्यांच्या मोबाइल क्रमांकावर संपर्क साधला. आयुर्विमा पाॅलिसीचे पैसे परत मिळवून देतो, अशी बतावणी केली. त्यानंतर चोरट्यांनी त्यांना पाॅलिसीची रक्कम परत मिळवण्यासाठी कागदपत्रांची पूर्तता करावी लागेल, असे सांगितले. विविध प्रकारचे कर भरल्यानंतर पाॅलिसीची संपूर्ण रक्कम व्याजासह मिळेल, असेही त्यांना सांगण्यात आले होते. वेगवेगळी कारणे सांगून चोरट्यांनी त्यांना पैसे भरण्यास सांगितले. चोरट्यांच्या खात्यात त्यांनी वेळोवेळी २८ लाख ३८ हजार रुपये जमा केले. पाॅलिसीचे पैसे परत मिळवून न दिल्याने त्यांनी चोरट्यांच्या मोबाइल क्रमांकावर संपर्क साधला. चोरट्यांचा मोबाइल क्रमांक बंद असल्याचे लक्षात आले. ज्येष्ठ नागरिकाने नुकतीच पोलिसांकडे तक्रार दिली. गुन्हे शाखेचे पोलीस निरीक्षक कैलास कोडग तपास करत आहेत.
व्यावसायिकाची १० लाखांची फसवणूक
सायबर चोरट्यांनी एका व्यावसायिकाची दहा लाख ३८ हजार रुपयांची फसवणूक केली. याबाबत एका व्यावसायिकाने नांदेड सिटी पोलीस ठाण्यात फिर्याद दिली आहे. तक्रारदार व्यावसायिक हे सिंहगड रस्ता परिसरात राहायला आहेत. सायबर चोरट्यांनी त्यांच्या मोबाइल क्रमांकावर संपर्क साधला. स्वस्तात लिथियम बॅटरी देतो, असे चोरट्यांनी त्यांना सांगितले. त्यानंतर चोरट्यांनी त्यांना बँक खात्यात पैसे जमा करण्यास सांगितले. चोरट्यांच्या खात्यात त्यांनी वेळोवेळी पैसे जमा केले. फसवणूक झाल्याचे लक्षात आल्यानंतर त्यांनी पोलिसांकडे तक्रार दिली. वरिष्ठ पोलीस निरीक्षक अतुल भोस तपास करत आहेत.
