चोरट्यांकडून १८ लाख ४९ हजारांचा मुद्देमाल जप्त
marathinews24.com
पुणे – गजबजलेल्या कसबा पेठेत सोसायटीतील सदनिकेचे कुलूप तोडून ११ लाख रुपयांचा ऐवज चोरून पसार झालेल्या चोरट्यांना फरासखाना पोलिसांनी अटक केली. चोरट्यांकडून १८ लाख ४९ हजार रुपयांचा मुद्देमाल जप्त करण्यात आला.
मेफेड्रोन विक्री प्रकरणात एक जण अटकेत – सविस्तर बातमी
चंंद्रकांत उर्फ चंद्या अनंत माने (वय ३३, रा. वेताळनगर, चिंचवड), रामा उर्फ रामजाने लक्ष्मण क्षीरसागर (वय ३३, रा. गौर वाघोली, ता. कळंब, जि. धाराशिव) अशी अटक करण्यात आलेल्यांची नावे आहेत. ६ मार्च रोजी कसबा पेठेतील पवळे चौकात असलेल्या एका सोसायटीत शिरुन माने आणि क्षीरसागर यांनी बंद सदनिकेचे कुलूप तोडले. शयनगृहातील कपाट उचकटून दोघांनी सोन्याचे दागिने, रोकड असा ५० हजारांचा ऐवज चोरून नेला होता. याप्रकरणी फरासखाना पोलीस ठाण्यात गुन्हा दाखल करण्यात आला होता. घटनेची माहिती मिळताच पोलिसांनी तपास केला. पोलिसांनी सीसीटीव्ही चित्रीकरण तपासले. तपासात सराईत चोरटे माने आणि क्षीरसागर यांनी घरफोडी केल्याची माहिती पोलीस हवालदार गजानन सोनुने यांना मिळाली. सोनुने यांनी चित्रीकरणात आरोपींना ओळखले होते.
घरफोडी करुन दोघे आरोपी दिल्ली, आग्रा. अयोध्या, झाशी, लातूर, बार्शी येथून छत्रपती संभाजीनगरमध्ये गेले. छत्रपती संभाजीनगर पोलिसांनी दोघांना ताब्यात घेतले. त्यानंतर फरासखाना पोेलिसांनी दोघांना अटक केली. पोलीस उपायुक्त मिलिंद माेहिते, सहायक आयुक्त अनुजा देशमाने यांच्या मार्गदर्शनाखाली फरासखाना पोलीस ठाण्याचे वरिष्ठ पोलीस निरीक्षक प्रशांत भस्मे, गुन्हे शाखेचे निरीक्षक शिवप्रकाश मुळे, उपनिरीक्षक अरविंद शिंदे, नितीन तेलंगे, गजानन सोनुने, महेश राठोड, प्रवीण पासलकर, विशाल शिंदे, नितीन जाधव, महेश पवार, चेतन होळकर, सुमीत खुट्टे यांनी ही कामगिरी केली.
