मार्केटयार्ड पोलिसांची कामगिरी
marathinews24.com
पुणे – दिडीतील वारकऱ्यांचे मोबाइल लांबविणाऱ्या चोरट्यांना मार्केट यार्ड पोलिसांनी अटक केली. प्रकाश देवराम परिहार (वय २९, रा. लाेहियानगर), मोहम्मद मनान जमाल शेख (वय २५, रा. मार्केट यार्ड) अशी अटक करण्यात आलेल्यांची नावे आहेत. मार्केट यार्डातील श्री शारदा गजानन मंदिराजवळ दिंडी आली होती. दिंडी सोहळ्यातील वारकऱ्यांचे मोबाइल परिहार आणि शेख यांनी लांबविले.
गस्त घालणाऱ्या मार्केट यार्ड पोलीस ठाण्याच्या पोलीस निरीक्षक मनीषा पाटील, गुन्हे शाखेच्या निरीक्षक सुनीता नवले यांच्या मार्गदर्शनाखाली तपास पथकाने शेख आणि परिहार यांना पकडले. त्यांच्याकडून दोन मोबाइल जप्त करण्यात आले. दरम्यान, पालखी सोहळ्यात दर्शन घेणाऱ्या महिलांकडील दागिने चोरल्याची घटना मुंबई-पुणे रस्त्यावरील बोपोडी चौक आणि खडकी परिसरात घडली. याप्रकरणी चोरट्यांविरुद्ध खडकी पोलीस ठाण्यात गुन्हा दाखल करण्यात आला आहे.
याबाबत एका ६८ वर्षीय महिलेने खडकी पोलीस ठाण्यात फिर्याद दिली आहे. तक्रारदार महिला बोपोडी चौकात श्री संत तुकाराम महाराज यांच्या पालखीचे दर्शन घेण्यासाठी आल्या होत्या. दर्शनासाठी गर्दी झाली होती. गर्दीत पालखीचे दर्शन घेणारया महिलेच्या गळ्यातील मंगळसूत्र चोरट्यांनी लांबविले. पालखी सोहळ्यात आणखी एका महिलेचे दागिने चोरट्यांनी लांबविल्याची घटना घडली. पोलिसंनी साध्या वेशाताली पोलिसांचा बंदोबस्त पालखी मार्गावर तैनात केला होता.
