भगवान जगन्नाथ रथयात्रेनिमित्त मध्यभागात आज वाहतूक बदल

दुपारी १ ते सायंकाळी ७.३० पर्यंत वाहतूक वळविणार

marathinews24.com

पुणे – आंतरराष्ट्रीय कृष्णभावनामृत संघाकडून (इस्काॅन) रविवारी (१९ जुलै) भगवान जगन्नाथ रथयात्रा काढण्यात येणार आहे. रथयात्रेनिमित्त मध्यभागातील वाहतूक व्यवस्थेत दुपारी एक ते सायंकाळी साडेसात या वेळेत बदल करण्यात येणार आहेत.

ऑनलाइन ट्रेडिंग’च्या मोहात शेजाऱ्यांच्या घरात घरफोडी – सविस्तर बातमी

‘टिळक रस्त्यावरील स. प. महाविद्यालय चौकातून रथयात्रेचा प्रारंभ होणार आहे. टिळक रस्ता, बाजीराव रस्ता, शनिपार चौक, नगरकर तालीम चौक, लक्ष्मी रस्ता, उंबऱ्या गणपती चौक (शगुन चौक), रमणबाग चौक, ओंकारेश्वर मंदिर, महर्षी विठ्ठल रामजी शिंदे पूल, झाशीची राणी लक्ष्मीबाई चौक, जंगली महाराज रस्ता, डेक्कन जिमखाना, खंडोजीबाबा चौक, टिळक चौक, टिळक रस्ता या मार्गाने रथयात्रा जाणार आहे. स. प. महाविद्यालयाजवळ रथयात्रेची सांगता होणार आहे.

रथयात्रेनिमित्त रविवारी दुपारी एक ते सायंकाळी साडेसात या वेळेत वाहतूक बदल करण्यात येणार आहेत. वाहतूक बदल तात्पुरत्या स्वरुपात करण्यात आले असून, वाहनचालकांनी सहकार्य करावे’, असे आवाहन वाहतूक शाखेचे पोलीस उपायुक्त डाॅ. संदीप भाजीभाकरे यांनी केले आहे.

स. प. महाविद्यालयातून रथयात्रा सुरू झाल्यानंतर टिळक रस्त्याने स्वारगेटकडे जाणाऱ्या वाहनचालकांनी लालबहाद्दुर शास्त्री रस्ता, सेनादत्त चौक, दांडेकर पूल चौकातून इच्छितस्थळी जावे. पूरम चौकातून टिळक रस्त्याकडे येणाऱ्या वाहनचालकांनी मित्रमंडळ चौकातून इच्छितस्थळी जावे. रथयात्रा पूरम चौकातून बाजीराव रस्त्यावर आल्यानंतर वाहनचालकांनी पूरम चौकातून टिळक रस्तामार्गे इच्छितस्थळी जावे. रथयात्रा लक्ष्मी रस्ता परिसरात आल्यानंतर वाहनचालकांनी बाजीराव रस्ता, अप्पा बळवंत चौक, शनिवार वाडा या मार्गाने इच्छितस्थळी जावे. रमणबाग ते ओंकारेश्वर दरम्यान रथयात्रा आल्यानंतर वाहन चालकांनी नदीपात्रातील रस्ता किंवा लक्ष्मी रस्त्याचा वापर करावा.

डेक्कन जिमखाना भागात दुचाकी चोरणारे अटकेत

डेक्कन जिमखाना भागातून दुचाकी चोरुन पसार झालेल्या चोरट्यांना पोलिसांनी अटक केली. चोरट्यांकडून दोन दुचाकी जप्त करण्यात आल्या. आकाश अरविंद गुजर (वय २८ ,रा. आंबेगाव खुर्द), इब्राहिम इस्माईल शेख (वय ३५, रा. भागोदयनगर, कोंढवा) अशी अटक करण्यात आलेल्यांची नावे आहेत.

डेक्कन जिमखाना भागातून एक दुचाकी चोरीला गेल्याची घटना नुकतीच घडली होती. याबाबत डेक्कन पोलीस ठाण्यात गुन्हा दाखल करण्यात आला होता. पोलिसांनी तपास करुन गुजर आणि शेख यांना पकडले. चौकशीत दोघांनी दोन दुचाकी चोरल्याचे निष्पन्न झाले. त्यांच्याकडून दोन दुचाकी जप्त करण्यात आल्या. वरिष्ठ पोलीस निरीक्षक रुणाल मुल्ला, पोलीस निरीक्षक सपना देवताळे, उपनिरीक्षक अजय भोसले, योगेश मोरे, दत्तात्रय शिंदे, प्रशांत पवार, राजेंद्र मारणे, सचिन गायकवाड, सागर घाडगे, वसीम सिद्दीकी, धनश्री सुपेकर यांनी ही कारवाई केली.