दिल्लीतील घटनेच्या निषेधार्थ जिल्हाधिकारी कार्यालयावर मोर्चा; पर्यायी मार्गांवर वाहनांच्या लांबच लांब रांगा
marathinews24.com
पुणे – काॅक्रोच जनता पार्टीच्या आंदोलनामुळे शहराच्या मध्य भागात वाहतूक कोंडी झाली. जिल्हाधिकारी कार्यालयासमोर शुक्रवारी सायंकाळपर्यंत आंदोलन सुरू होते. आंदोलन संपल्यानंतर वाहतूक सुरळीत झाली. दिल्लीतील घटनेच्या निषेधार्थ काॅक्रोच जनता पार्टीकडून शुक्रवारी दुपारी तीनच्या सुमारास जिल्हाधिकारी कार्यालयावर मोर्चा काढण्यात आला. मोर्चाचा प्रारंभ कसबा पेठेतील जिजामात चौकातून करण्यात आला. फडके हौद चौक, दारुवाला पूल, नरपतगिरी चौकमार्गे मोर्चा जिल्हाधिकारी कार्यालय परिसरात सायंकाळी पाचच्या सुमारास पोहोचला.
माेर्चाची सुरुवात झाल्यानंतर कसबा पेठेतून पुणे स्टेशनकडे जाणाऱ्या वाहतूक व्यवस्थेत बदल करण्यात आले. जिजामाता चौक, गणेश रस्ता, दारुवाला पूल, अपोलो चित्रपटगृह रस्ता, नरपतगिरी चौक हा मार्ग वाहतुकीस बंद करण्यात आला. वाहतूक पर्यायी मार्गाने वळविण्यात आल्याने कुंभारवेस चौक ते मंगळवार पेठेतीलशाहीर अमर शेख चौक, लोहपुरुष सरदार वल्लभभाई पटेल चौक (मालधक्का चौक), जिल्हाधिकारी कार्यालय चौक परिसरात वाहतूक कोंडी झाली. वाहतूक कोंडी झाल्याने वाहनचालक पर्यायी मार्गाने पुणे स्टेशनकडे पोहोचण्याच्या प्रयत्नात होते. कागदीपूरा, कुंभारवेस चौक, शाहीर अमरशेख चौक परिसरात वाहनांच्या रांगा लागल्या होत्या.
सोमवार पेठ, मंगळवार पेठ, कसबा पेठ परिसरातील छोट्या रस्त्यावर कोंडी झाली होती. वाहतूक नियोजनासाठी अतिरिक्त पोलीस बंदोबस्त नेमण्यात आला होता. नरपतगिरी चौकाकडून जिल्हाधिकारी कार्यालयाकडे जाणारा रस्ता वाहतुकीस बंद करण्यात आला होता. आंदोलन संपल्यानंतर सायंकाळी साडेसहा ते सातच्या सुमारास वाहतूक सुरळीत झाली, अशी माहिती वाहतूक पोलिसांनी दिली.
