सायबर चोरट्याने घातला गंडा
marathinews24.com
पुणे – आयपीओसह शेअर मार्केटमध्ये गुंतवणूक केल्यास चांगला परतावा मिळवून देतो, अशी बतावणी करीत सायबर चोरट्याने एकाला तब्बल ७१ लाख २० हजारांचा ऑनलाईन गंडा घातला आहे. ही घटना २४ डिसेंबर २०२४ ते ५ मार्च २०२६ कालावधीत कोथरूडमध्ये घडली आहे. याप्रकरणी ५३ वर्षीय नागरिकाने सायबर पोलीस ठाण्यात फिर्याद दाखल केली आहे. त्यानुसार मोबाइलधारक, लिंकधारकाविरूद्ध गुन्हा दाखल केला आहे.
झोपलेल्या चालकाच्या अंगावरून गेला ट्रक – सविस्तर बातमी
पोलिसांनी दिलेल्या माहितीनुसार, तक्रारदार हे कोथरूडमध्ये राहायला असून, डिसेंबर २०२४ मध्ये सायबर चोरट्यांनी त्यांना एका व्हॉटसअॅप गु्रपमध्ये समाविष्ट केले होते. त्याठिकाणी आयपीओ आणि शेअर मार्केटबाबत चर्चा करून तक्रारदाराचा विश्वास संपादित केला. जादा परताव्याच्या आमिषाला भुलून तक्रारदाराने गुंतवणूकीला सुरूवात केली. जवळपास पावणेदोन वर्षांत त्यांनी ७१ लाख २० हजार रूपये संबंधितांच्या बँकखात्यात वर्ग केले. मात्र, त्यांना परतावा मिळाला नाही. फसवणूक झाल्याचे लक्षात आल्यानंतर तक्रारदाराने सायबर पोलीस ठाण्यात धाव घेतली. याप्रकरणी वरिष्ठ पोलीस निरीक्षक स्वप्नाली शिंदे तपास करीत आहे.
जॉबच्या बहाण्याने तरूणीची फसवणूक
जॉब देण्याच्या बहाण्याने सायबर चोरट्यांनी तरूणीकडून तब्बल ८ लाख ९१ हजार रूपये ऑनलाईनरित्या वर्ग करून घेत फसवणूक केली आहे. ही घटना ९ ते १३ मे २०२६ कालावधीत कोंढवा बुद्रूकमध्ये घडली आहे. याप्रकरणी संबंधित तरूणीने कोंढवा पोलीस ठाण्यात तक्रार दाखल केली आहे. त्यानुसार मोबाइलधारक, लिंकधारक, बँकखातेधारकाविरूद्ध गुन्हा दाखल करण्यात आला आहे. याप्रकरणी पोलीस निरीक्षक नवनाथ जगताप तपास करीत आहेत.
