विटंबना झाली असल्या कारणाने पोस्टर्स अखेर झाकले
marathinews24.com
पिंपरी – पिंपरी शहरातील भुयारी मार्गातील भिंतीवर लावण्यात आलेले छत्रपती शिवाजी महाराज व मुख्यमंत्री देवेंद्र फडणवीस यांचे पोस्टर्स अखेर झाकण्यात आले आहेत.
पिंपरी चिंचवड शहरात भुयारी मार्गातील भिंती, महत्त्वाच्या जागा या ठिकाणी अज्ञात व्यक्तींकडून छत्रपती शिवाजी महाराज व मुख्यमंत्री देवेंद्र फडणवीस यांचे पोस्टर्स लावण्यात आले होते मात्र काही समाजकंटकांकडून पान गुटखा खाऊन पोस्टरवर पिचकारी मारल्याचे आढळून आले. यात छत्रपती शिवाजी महाराज यांची विटंबना झाली आहे असे सांगत मराठा क्रांती मोर्चाच्या वतीने महापालिकेच्या मुख्य प्रशासकीय इमारती समोर गुरुवारी आंदोलन करण्यात आले होते. संबंधितांवर तात्काळ कारवाई करण्याची मागणी करण्यात आली होती. शुक्रवारी महापालिकेच्या वतीने हे पोस्टर्स झाकण्याचे काम हाती घेण्यात आले. पिंपरी चिंचवड महापालिके जवळील भुयारी मार्गात प्रामुख्याने तातडीने हे पोस्टर्स झाकण्यात आले.
