चोरट्यांविरुद्ध गुन्हा दाखल
marathinews24.com
पुणे – फ्लॅटचे कुलूप तोडून चोरट्यांनी ९ लाख रुपयांचे सोन्याचे दागिने लांबविल्याची घटना खडकवासला परिसरात घडली. याप्रकरणी चोरट्यांविरुद्ध नांदेड सिटी पोलिसांनी गुन्हा दाखल केला. याबाबत एकाने फिर्याद दिली आहे.
‘आखाड पार्टीत तडीपार गुंडाच्या डोक्यात दगड घातला – सविस्तर बातमी
पोलिसांनी दिलेल्या माहितीनुसार, तक्रारदार हे खडकवासला रस्त्यावरील वृंदावन क्षितीज सोसायटीत राहायला आहेत. ७ ऑगस्ट रोजी तक्रारदार हे कुटुंबीयांसह बाहेरगावी गेले होते. चोरट्यांनी सदनिकेचे कुलूप तोडले. कपाट उचकटून ९ लाख सात हजार रुपयांचे दागिने लांबविले. तक्रारदार हे ९ ऑगस्टला परतल्यानंतर सदनिकेचे कुलूप तुटल्याचे लक्षात आले. चोरट्यांनी दागिने चोरुन नेल्याचे उघडकीस आल्यानंतर पोलिसांकडे तक्रार देण्यात आली. वरिष्ठ पोलीस निरीक्षक अतुल भोस यांनी घटनास्थळी भेट दिली. पोलिसांनी सोसायटीच्या आवारातील सीसीटीव्ही चित्रीकरण तपासले असून, पोलीस उपनिरीक्षक डी. डी. सावंत तपास करत आहेत.
रामटेकडीतील ओैद्योगिक वसाहतीत चोरी
हडपसरमधील रामटेकडी ओैद्योगिक असलेल्या खासगी कंपनीतून चोरट्यांनी सौरउर्जा यंत्रणा बसविण्यासाठी लागणारे साहित्य चोरुन नेल्याची घटना उघडकीस आली. याबाबत कंपनीतील कर्मचाऱ्याने वानवडी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, रामटेकडी ओैद्योगिक वसाहतीत सनलाईट डेव्हलपर्स ही कंपनी आहे. सौरउर्जा यंत्रणा बसविण्यासाठी लागणारे साहित्य निर्मिती करण्याचे काम या कंपनीत केले जाते. चोरट्यांनी कंपनीच्या आवारातील संरक्षक जाळी तोडून आत प्रवेश केला. चोरट्यांनी ७५ हजार रुपयांचे साहित्य चोरुन नेल्याचा प्रकार नुकताच उघडकीस आला. वरिष्ठ पोलीस निरीक्षक पंडीत रेजितवाड यांनी घटनास्थळी भेट दिली असून, हवालदार राऊत तपास करत आहेत. रामटेकडी ओैद्योगिक वसाहतीतल खासगी कंपन्यांच्या आवारात शिरुन तांब्याची तार चोरुन नेण्यात आल्याची घटना नुकतीच घडली होती.
