अग्निशमन दलामुळे मोठी दुर्घटना टळली
marathinews24.com
पुणे – शहरातील हडपसर-कात्रज बायपास रोडवरील हांडेवाडी चौकात असलेल्या फर्निचर हाउस, सजावट फर्निचर, वीरभद्र फर्निचर आणि टेक्नोफास्ट इलेक्ट्रिक दुकानांना भीषण आग लागल्याची घटना मंगळवारी (दि.१६) घडली. आगीत प्रत्येकी दोन हजार चौरस फूट क्षेत्रफळाच्या चार व्यावसायिक दुकानांचे मोठे नुकसान झाले आहे. मोठ्या प्रमाणावर फर्निचर व इतर साहित्य जळून नुकसान झाले. घटनेची माहिती मिळताच काळेपडळ अग्निशमन केंद्राची फायरगाडी सर्वप्रथम घटनास्थळी दाखल झाली. तात्काळ आग विझविण्याचे काम सुरू केले.
वैमनस्यातून दोघांवर शस्त्राने वार – सविस्तर बातमी
कोंढवा बुद्रुक येथील फायरगाडी व वॉटर टँकर, कोंढवा खुर्द येथील फायरगाडी, मध्यवर्ती अग्निशमन केंद्राचा वॉटर टँकर, गंगाधाम येथील फायरगाडी, एरंडवणामधील वॉटर टँकर, हडपसर अग्निशमन केंद्राची फायरगाडी, स्थानिक व महानगरपालिकेचे टँकर मदतीसाठी घटनास्थळी दाखल झाले. अनेक तासांच्या प्रयत्नानंतर अग्निशमन दलाने आगीवर पूर्णपणे नियंत्रण मिळवले. आग विझवताना एलपीजी गॅस सिलेंडर सुरक्षितपणे बाहेर काढण्यात आला. तसेच आगीच्या ठिकाणालगत पेट्रोल पंप तसेच शिवेंद्र हॉटेल असल्याने मोठी दुर्घटना घडण्याची शक्यता होती.
मात्र अग्निशमन दलाच्या प्रभावी कार्यवाहीमुळे आग या परिसरापर्यंत पोहोचू शकली नाही. त्यामुळे संभाव्य मोठा अनर्थ टाळण्यात आला. अग्निशमन कार्यात स्टेशन ऑफिसर समीर शेख, अनिल गायकवाड, सुनील नाईकनवरे, प्रभारी अधिकारी विलास दडस, कैलास शिंदे, इतर अधिकारी व कर्मचारी सहभागी झाले होते. मुख्य अग्निशमन अधिकारी देवेंद्र पोटफोडे यांच्या मार्गदर्शनाखाली ही संपूर्ण आग विझवण्यात आली.
अग्निशमन दलाच्या तत्पर, धाडसी व समन्वयपूर्ण कार्यामुळे मोठी संभाव्य दुर्घटना टळल्याने परिसरातील नागरिक व व्यावसायिकांनी समाधान व्यक्त करत अग्निशमन दलाचे आभार मानले.
