चोरट्यांविरुद्ध गुन्हा दाखल
marathinews24.com
पुणे – स्पर्धा परीक्षेची तयारी करणाऱ्या तरुणाचा मोबाइल हिसकावून नेल्याची घटना सदाशिव पेठेत घडली. या प्रकरणी दुचाकीस्वार चोरट्यांविरुद्ध गुन्हा दाखल करण्यात आला. याबाबत एका तरुणाने विश्रामबाग पोलीस ठाण्यात फिर्याद दिली आहे.
पुण्यात बुलेट चालकांविरुद्ध कारवाईचा बडगा – सविस्तर बातमी
पोलिसांनी दिलेल्या माहितीनुसार, तक्रारदार तरुण स्पर्धा परीक्षेची तयारी करत आहे. तो मूळचा अकोला जिल्ह्यातील आहे. सध्या तो लोकमान्यनगर परिसरात राहायला आहे. १ ऑगस्ट रोजी रात्री अकराच्या सुमारास तो सदाशिव पेठेतील ज्ञानप्रबोधिनी परिसरातून निघाला होता. त्या वेळी दुचाकीवरुन आलेल्या दोन चोरट्यांनी त्याच्या हातातील मोबाइल हिसकावून नेला. पोलिसांनी ज्ञानप्रबोधिनी परिसरातील सीसीटीव्ही चित्रीकरण तपासले. पसार झालेल्या चाेरट्यांचा शोध घेण्यात येत असून, पोलीस हवालदार शेंडजाळे तपास करत आहे.
लोकशाहीर अण्णाभाऊ साठे जयंतीनिमित्त मिरवणूक पाहण्यासाठी आलेल्या तरुणाच्या गळ्यातील एक लाख रुपयांची सोनसाखळी चोरट्यांनी लांबविल्याची घटना सारसबाग परिसरात घडली. याबाबत एका तरुणाने स्वारगेट पोलीस ठाण्यात फिर्याद दिली आहे. या प्रकरणी चोरट्यांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, लोकशाहीर अण्णाभाऊ साठे जयंतीनिमित्त सारसबाग परिसरातून शनिवारी (१ ऑगस्ट) मिरवणूक काढण्यात आली. रात्री नऊच्या सुमारास स्वारगेट परिसरातील लक्ष्मीनारायण चित्रपटगृहाजवळ गर्दीत तरुणाच्या गळ्यातील एक लाख रुपयांची सेानसाखळी चोरली. सहायक पोलीस निरीक्षक शेळके तपास करत आहेत.
