आप्पा बळवंत चौकात वाहतूक पोलिसांची कारवाई
marathinews24.com
पुणे – ठाणे शहरात एकाची ९३ लाख रुपयांची फसवणूक करुन पसार झालेल्या दोघांना वाहतूक पोलिसांनी आप्पा बळवंत चौक परिसरात पकडले. या प्रकरणात ताब्यात घेण्यात आलेल्या दोघांना वाहतूक पोलिसांनी ठाणे शहर पोलिसांच्या ताब्यात दिले आहे.
येरवडा जेलबाहेर फटाके उडवून आरोपीचे उदात्तीकरण – सविस्तर बातमी
अक्षय संजय तांबे (वय २२), ओंकार विष्णू शिरसाठ (वय २४, दोघे रा. ठाणे) अशी ताब्यात घेण्यात आलेल्यांची नावे आहेत. ठाणे शहरातील कोपरी पोलीस ठाण्यात तांबे आणि शिरसाठ यांच्याविरुद्ध फसवणूक आणि माहिती-तंत्रज्ञान कायद्यान्वये गुन्हा दाखल करण्यात आला होता. दाेघांनी एकाची ९३ लाखांची फसवणूक केली होती. कोपरी पोलिसांकडून या प्रकरणाचा तांत्रिक तपास करण्यात येत होता. आरोपी आप्पा बळवंत चौक परिसरात असल्याची माहिती कोपरी पोलिसांना मिळाली होती. याबाबतची माहिती वाहतूक पोलिसांच्या विश्रामबाग शाखेतील सहायक निरीक्षक म्हात्रे यांना कळविण्यात आली.
पोलीस उपायुक्त डाॅ. संदीप भाजीभाकरे यांच्या मार्गदर्शनाखाली सहायक पोलीस निरीक्षक म्हात्रे, हवालदार खरात, गौड पोलीस शिपाई शेख, कानवडे, प्रधान यांनी सापळा लावून दोघांना ताब्यात घेतले. चौकशीत दोघे जण ठाणे शहरातील फसवणुकीच्या गु्न्ह्यात फरार असल्याचे निष्पन्न झाले. तांबे आणि शिरसाठ यांना तपासासाठी कोपरी पोलिसांच्या ताब्यात देण्यात आले आहे, अशी माहिती वाहतूक शाखेकडून कळविण्यात आली आहे.
