तरुणींसह तिघे अटकेत; टोळक्याविरुद्ध गुन्हा
marathinews24.com
पुणे – डेक्कन जिमखाना परिसरातील फ्लाईंग जिप्सी हाॅटेलसमोर तरुणाच्या डोक्यात शस्त्राने वार करुन त्याला मारहाण करण्यात आल्याची घटना शनिवारी पहाटे घडली. या प्रकरणी दोन तरुणींसह साथीदाराला अटक करण्यात आली असून, त्यांच्याबरोबर असलेल्या सात ते आठ जणांविरुद्ध गुन्हा दाखल करण्यात आला.
पिस्तूल बाळगणारे गुंड गजाआड – सविस्तर बातमी
अथर्व प्रमोद जगताप (वय १९, रा. ऑरा सोसायटी, शिवसृष्टीजवळ, आंबेगाव) असे जखमी झालेल्याचे नाव आहे. या प्रकरणी माधवी कुंभार (रा. काळेपडळ, हडपसर), स्नेहल सोनके (रा. पिंपळे गुरव), शार्दुल ओव्हाळ (रा. हडपसर) यांना अटक करण्यात आली. त्यांच्याबरोबर असलेल्या सात ते आठ जणांविरुद्ध गु्न्हा दाखल करण्यात आला. याबाबत जगताप याने डेक्कन पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, आरोपी तरुणी आणि फिर्यादी अथर्व जगताप हे ओळखीचे आहेत. सातारा येथे त्यांची काही महिन्यांपूर्वी भांडणे झाली होती. शनिवारी (१५ ऑगस्ट) पहाटे सव्वातीनच्या सुमारास अथर्व हा फ्लाईंग जिप्सी हाॅटेलमधून बाहेर पडत होता. त्या वेळी टोळक्याने अथर्वला अडवले. ‘तू तरुणींना काय बोलला. आमच्याबरोबर चल तुला दाखवितो’, अशी धमकी दिली. अथर्व घाबरून हाॅटेलमध्ये पळाला. त्या वेळी आरोपी तरुणी आणि साथीदारांनी त्याला शिवीगाळ केली. ‘याला मारा, जिवंत सोडू नका’, अशी धमकी देऊन त्याच्या डोक्यात शस्त्राने वार केला. हाॅटेलमधील खुर्ची त्याला फेकून मारली, तसेच लाथाबुक्क्यांनी मारहाण केली. डेक्कन जिमखाना भागातील शिरोळे रस्त्यावर असलेले हाॅटेल मध्यरात्रीपर्यंत सुरू असल्याने यापूर्वी पोलिसांनी कारवाई केली होती. संबंधित हाॅटेल मालकाविरुद्ध कारवाई केली होती. या हाॅटेलच्या परिसरात यापूर्वी मारामारीच्या घटना घडल्या होत्या. रात्री अपरात्री तरुणांचा आवाजामुळे, गोंधळामुळे स्थानिक नागरिकांनी पोलिसांकडे तक्रारी दिल्या होत्या.
