खडकी रेल्वे स्थानकात पोलिसांची कारवाई
marathinews24.com
पुणे – परदेशी बनावटीचे पिस्तूल बाळगणाऱ्या सराइताला लोहमार्ग पोलिसांच्या पथकाने खडकी रेल्वे स्थानक परिसरात पकडले. या प्रकरणात सराइताच्या साथीदाराला अटक करण्यात आली. त्यांच्याकडून परदेशी बनावटीचे पिस्तूल, सहा काडतुसे जप्त करण्यात आली. याप्रकरणी वीर श्याम दलगज (वय २२, रा. पारसी चाळ, देहूरोड), सार्थक शिवनागी वाघलगवे (वय २२, रा. पिंपरी) यांना अटक करण्यात आली. दलगजविरुद्ध देहूरोड पोलीस ठाण्यात गंभीर स्वरुपाचे दोन गुन्हे दाखल आहेत.
लक्ष्मी रस्त्यावरील सराफी पेढीतून अंगठी चोरीला – सविस्तर बातमी
लोहमार्ग पोलिसांचे पथक ११ ऑगस्टला खडकी रेल्वे स्थानक परिसरात मध्यरात्री गस्त घालत होते. त्यावेळी दलगज हा फलाट क्रमांक एक परिसरात थांबला होता. अंधारात थांबलेल्या दलगज याला पोलिसांना पाहिले. पोलिसांना पाहताच तो पसार झाला. पोलिसांनी त्याला पाठलाग करुन पकडले. पोलिसांनी त्याची झडती घेतली. तेव्हा त्याच्याकडे परदेशी बनावटीचे पिस्तूल, तसेच सहा काडतुसे सापडली. पिस्तुलाबाबत पोलिसांनी चौकशी केली. तेव्हा साथीदार वाघलगवेने पिस्तूल दिल्याची माहिती मिळाली. पोलिसांनी वाघलगवे याला ताब्यात घेतले. परदेशी बनावटीचे पिस्तूल कुठून आणले, तसेच त्यांना कोणी दिले, यादृष्टीने पोलिसांकडून तपास करण्यात येत आहे.
लोहमार्ग पोलीस अधीक्षक डाॅ. राजकुमार शिंदे, अतिरिक्त अधीक्षक विशाल गायकवाड, उपविभागीय अधिकारी अजय संकेश्वरी यांच्या मार्गदर्शनाखाली पुणे रेल्वे स्थानक लोहमार्ग पोलीस ठाण्याचे वरिष्ठ पोलीस निरीक्षक प्रमोद खोपीकर, गुन्हे शाखेचे निरीक्षक सीताराम फंड, उपनिरीक्षक शंभू रणवरे, यशवंत साळुंखे, अमरदीप साळुंखे, इम्तियाज आवटी, धीरज कपिले, प्रशांत डोईफोडे, अमोल शेळके, अमोल कोकणे, सागर शेंडकर, गणेश बच्छाव यांनी ही कामगिरी केली.
