चोरट्याविरुद्ध गुन्हा दाखल
marathinews24.com
पुणे – शहरातील मध्यवर्ती लक्ष्मी रस्त्यावरील सराफी पेढीत खरेदीच्या बहाण्याने शिरलेल्या चोरट्याने ४० हजार रुपयांची सोन्याची अंगठी चोरुन नेल्याची घटना उघडकीस आली. या प्रकरणी चोरट्यांविरुद्ध विश्रामबाग पोलिसांनी गुन्हा दाखल केला. याबाबत सराफी पेढीतील कर्मचारी महिलेने फिर्याद दिली आहे. त्यांनी दिलेल्या फिर्यादीनुसार, चोरट्याविरुद्ध गुन्हा दाखल करण्यात आला आहे.
घरकाम करणाऱ्या महिलेकडून दागिने लंपास – सविस्तर बातमी
पोलिसांनी दिलेल्या माहितीनुसार, लक्ष्मी रस्त्यावरील उंबऱ्या गणपती चौकात सराफी पेढी आहे. १३ ऑगस्ट रोजी दुपारी दोनच्या सुमारास चोरटा सराफी पेढीत खरेदीच्या बहाण्याने शिरला. चोरट्याने सराफी पेढीतील कर्मचारी महिलेला अंगठी दाखविण्यास सांगितले. महिलेला बोलण्यात गुंतवले. महिलेचे लक्ष नसल्याची संधी साधून चोरट्याने ४० हजार रुपयांची सोन्याची अंगठी चोरुन नेली. अंगठी चोरुन चोरटा पसार झाला. चोरट्याने अंगठी चोरल्याचा प्रकार उघडकीस आल्यानंतर पोलिसांकडे तक्रार देण्यात आली. पोलिसांकडून सराफी पेढीतील सीसीटीव्ही चित्रीकरण तपासण्यात आले असून, पसार झालेल्या चोरट्याचा शोध घेण्यात येत आहे. पोलीस हवालदार कुचेकर तपास करत आहेत.
