दोघे जखमी; देहूरोड येथील घटना
marathinews24.com
पिंपरी – लोणावळ्यात वर्षाविहार करुन येताना समोरून जाणाऱ्या टेम्पोला पाठीमागून जोरदार धडक बसून झालेल्या अपघातात मोटारीतील दोन महाविद्यालयीन विद्यार्थ्यांचा जागीच मृत्यू झाला. दोघेजण जखमी झाले आहेत. हा अपघात गुरुवारी पहाटे पावणे सहाच्या सुमारास मुंबई-बंगळुरु महामार्गावर देहूरोड येथे झाला.
रामटेकडीतील पोलीस वसाहतीत घरफोडी – सविस्तर बातमी
सिद्धांत आनंद (वय २३ रा. झारखंड) आणि दिव्यराज राठोड (वय २२, रा. राजस्थान) अशी अपघातात मृत्यू झालेल्या दोघांची नावे आहेत. मोटारचालक निहाल तांबोळी, हर्ष मिश्रा दोघे जखमी झाले आहेत. टेम्पोचालक मनिषकुमार सूरज मनीपाल (वय ३९, रा.मुंबई) याला देहूरोड पोलिसांनी ताब्यात घेतले आहे.
देहूरोड पोलीस ठाण्याचे वरिष्ठ पोलीस निरीक्षक विक्रम बनसोडे यांनी याबाबतची माहिती दिली. सिद्धांत, दिव्यराज हे किवळेतील एका महाविद्यालयात व्यवस्थापनशास्त्राचा (बीबीए) अभ्यासक्रम शिकत होते. त्यांच्यासह चार मित्र बुधवारी रात्री लोणावळ्याला वर्षाविहारासाठी गेले होते. शुक्रवारी पहाटे ते लोणावळ्याकडून मोटारीतून किवळेला जात होते. निहाल मोटार चालवत होता. देहूरोड येथील सेंट्रल चौकाच्या पुढे समोरून एक टेम्पो जात होता. निहाल याला समोरील टेम्पो दिसला नाही. मोटार पाठीमागून जोरात टेम्पोला धडकली. हा अपघात इतका भीषण होता की मोटारीच्या पुढच्या भागाचा चक्काचूर झाला आहे. या अपघातात सिद्धांत, दिव्यराज या दोन विद्यार्थ्यांचा जागीच मृत्यू झाला. निहाल, हर्ष हे दोघे जखमी झाले आहेत. त्यांच्यावर वाकड परिसरातील एका खासगी रुग्णालयात उपचार सुरू आहेत. देहूरोड पोलीस तपास करत आहेत.
