अल्पवयीन मुलीसह महिलेची सुटका
marathinews24.com
पुणे – शहरातील वारजे परिसरातील एका लॉजमध्ये सुरू असलेल्या कथित वेश्याव्यवसायावर गुन्हे शाखेच्या अनैतिक मानवी वाहतूक व व्यापार प्रतिबंधक कक्षाने (एएचटीयू) धाड टाकून एका अल्पवयीन मुलीसह एका महिलेची सुटका केली. या कारवाईत वेश्याव्यवसायासाठी महिलांची व्यवस्था करणाऱ्या महिला एजंटला अटक करण्यात आली असून तिच्याविरुद्ध वारजे पोलिस ठाण्यात गुन्हा दाखल करण्यात आला आहे. आश्लेषा सचिन सोमणकर (वय ३४, रा. रूम नं. २, अंबिका निवास, हनुमान मंदिराजवळ, माई मंगेशकर हॉस्पिटलजवळ, वारजे, पुणे, मूळ रा. १५ बी-१५, ख्रिसमस हाऊस, मोगल लेन, माहिम, मुंबई) हिच्यावर वारजे पोलिस ठाण्यात भारतीय न्याय संहिता तसेच अनैतिक मानवी वाहतूक व व्यापार प्रतिबंधक कायदा १९५६ आणि पॉक्सो कायद्यान्वये गुन्हा दाखल करण्यात आला आहे.
मौजमजेसाठी सायकल चोरी; अल्पवयीन ताब्यात, १५ सायकली जप्त – सविस्तर बातमी
पोलिसांनी दिलेल्या माहितीनुसार, गुन्हे शाखेच्या अनैतिक मानवी वाहतूक व व्यापार प्रतिबंधक कक्षाला दि. ४ जूनला वारजेतील ‘साई एक्झिक्युटिव्ह लॉजिंग अँड बोर्डिंगमध्ये महिलांकडून वेश्या व्यवसाय करून घेतला जात असल्याची माहिती मिळाली होती. त्यानंतर पोलिस निरीक्षक छगन कापसे यांच्या मार्गदर्शनाखाली पथकाने तातडीने माहितीची पडताळणी केली. बनावट ग्राहक पाठवून माहितीची खात्री केल्यानंतर लॉजवर अचानक छापा टाकण्यात आला. कारवाईदरम्यान लॉजमध्ये वेश्या व्यवसायासाठी आणण्यात आलेल्या अल्पवयीन मुलीसह महिलेची सुटका केली.
त्यानंतर महिला एजंट आश्लेषा सोमणकर हिला ताब्यात घेण्यात आले. सुटका करण्यात आलेल्या पीडितांना संरक्षण व समुपदेशनासाठी संबंधित यंत्रणांकडे सुपूर्द करण्यात आले आहे. ही कारवाई पोलिस उपायुक्त (गुन्हे) गौहर हसन आणि सहायक पोलिस आयुक्त विजय कुंभार यांच्या मार्गदर्शनाखाली करण्यात आली. कारवाईत पोलिस निरीक्षक छगन कापसे यांच्यासह पोलिस अंमलदार ईश्वर आंधळे, बाबनराव केदार, दत्ताराम जाधव, किशोर भुजबळ, अविनाश कोंडे, वैशाली खेडेकर आणि वैशाली इंगळे यांनी सहभाग घेतला.
