8 ते 10 वाहनांचे नुकसान
marathinews24.com
पुणे – शहरातील कर्वेनगर परिसरात अज्ञात व्यक्तीने पार्क केलेल्या वाहनांवर ऍसिडसदृश रसायन टाकून नुकसान केल्याचा धक्कादायक प्रकार उघडकीस आला आहे. या घटनेत 8 ते 10 वाहनांचे नुकसान झाले असून नागरिकांमध्ये भीतीचे वातावरण निर्माण झाले आहे. नेमके किती वाहनांचे नुकसान झाले, तसेच हा प्रकार नेमका कोणत्या कारणातून करण्यात आला, याचा शोध पोलिस घेत आहेत.
पुण्यात कोम्बिंग ऑपरेशनचा तडाखा, ६ बांग्लादेशी महिला ताब्यात – सविस्तर बातमी
मिळालेल्या माहितीनुसार, कर्वेनगरमधील निवासी भागात रस्त्याच्या कडेला उभ्या असलेल्या काही चारचाकी आणि दुचाकी वाहनांवर रात्रीच्या वेळी अज्ञात व्यक्तीने ऍसिड किंवा रासायनिक द्रव्य फेकल्याचा संशय आहे. सकाळी वाहनमालकांनी गाड्यांवरील रंग उडालेला व बॉडी खराब झालेली पाहिल्यानंतर हा प्रकार उघडकीस आला. नुकसानग्रस्त वाहनधारकांनी तत्काळ पोलिसांशी संपर्क साधला. परिसरातील सीसीटीव्ही फुटेज जप्त करण्यात आले असून संशयितांचा माग काढण्याचे काम सुरू आहे. वाहनांना लक्ष्य करण्यामागे वैयक्तिक वैर, स्थानिक वाद, खोडसाळपणा की अन्य कोणता हेतू होता, याचा तपास केला जात आहे. प्रकारामुळे परिसरातील नागरिकांमध्ये संताप व्यक्त होत आहे. रात्रीच्या वेळी सुरक्षा व्यवस्थेचा प्रश्नही ऐरणीवर आला आहे. पोलिसांनी नागरिकांना संशयास्पद हालचाली दिसल्यास तातडीने माहिती देण्याचे आवाहन केले आहे.
दरम्यान, वाहनांचे मोठे आर्थिक नुकसान झाल्याने संबंधित वाहन धारकांनी दोषींवर कठोर कारवाईची मागणी केली आहे. कर्वेनगरमध्ये वाहनांवर ऍसिड टाकून नुकसान करणारी व्यक्ती नेमकी कोण आणि त्यामागील कारण काय, तपासातूनच समोर येईल.
