‘डिजिटल गोल्ड’च्या नावाखाली व्यावसायिकाला ९४.४० लाखांचा सायबर गंडा
marathinews24.com
पुणे – ‘डिजिटल गोल्डमध्ये गुंतवणुकीच्या आमिषाने व्यावसायिकाची सायबर चोरट्यांनी ९४ लाख ४० हजार रुपयांची फसवणूक केल्याचा प्रकार उघडकीस आला. या प्रकरणी सायबर चोरट्यांविरुद्ध गु्न्हा दाखल करण्यात आला आहे. याबाबत एकाने शिवाजीनगर येथील सायबर पोलीस ठाण्यात फिर्याद दिली आहे.
घर खरेदी करुन देण्याच्या आमिषाने ज्येष्ठाची फसवणूक – सविस्तर बातमी
पोलिसांनी दिलेल्या माहितीनुसार, तक्रारदार ५५ वर्षीय व्यावसायिक हे कल्याणीनगर भागात राहायला आहेत. सायबर चोरट्यांनी त्यांच्या मोबाइल क्रमांकावर संदेश पाठविला होता. ‘डिजिटल गोल्ड’मध्ये गुंतवणुकीचे आमिष चोरट्यांनी त्यांना सांगितले. गुंतवणूक योजना, तसेच परताव्याबाबत चोरट्यांनी त्यांना माहिती देऊन जाळ्यात ओढले. पैसे गुंतविल्यास चांगला परतावा मिळेल, असे सांगून चोरट्यांनी गेल्या सात ते आठ महिन्यात त्यांच्याकडून वेळोवेळी ऑनलाइन पद्धतीने पैसे घेतले. तक्रारदाराने चोरट्यांच्या बँक खात्यात वेळोवेळी ९४ लाख ४० हजार रुपये गुंतविले. पैसे गुंतविल्यानंतर त्यांना परतावा देण्यात आला नाही. फसवणूक झाल्याचे लक्षात आल्यानंतर त्यांनी नुकतीच पोलिसांकडे तक्रार दिली. पोलीस निरीक्षक संगीता देवकाते तपास करत आहेत.
