पोस्टमन घरी येऊन घेऊन जाणार फराळाचे पार्सल; टपाल विभागाचा अभिनव उपक्रम
marathinews24.com
बारामती – परदेशातील नातेवाईकांना दिवाळीच्या फराळाचा आस्वाद घेता यावा यासाठी टपाल विभाग सज्ज असून बारामती टपाल विभागाने नावीन्यपूर्ण उपक्रम राबवित फराळाचे पदार्थ माफक दरात परदेशात पाठविण्याची पार्सल सुविधा उपलब्ध करुन दिली आहे.
नानामहाराज मंडलिक जयंतीनिमित्त २५ शेतकरी कुटुंबांना ६.२५ लाखांची मदत – सविस्तर बातमी
आपल्या दैनंदिन कामातून वेळ काढून टपाल कार्यालयामध्ये येऊ शकत नाहीत अशा नागरिकांसाठी घरी येऊन फराळ पार्सल घेऊन जाण्याची सुविधा उपलब्ध करून देण्यात आली आहे. त्यासाठी पोस्टमन घरी येऊन फराळाच्या पदार्थांचे पार्सल विनामूल्य घेऊन जातील.
नोकरी आणि शिक्षणानिमित्त बारामती, इंदापूर, दौंड, सासवड, शिरूर येथून परदेशामध्ये जाणाऱ्यांची संख्या मोठी आहे. परदेशामध्ये वास्तव्यास असलेल्या प्रत्येकालाच दिवाळीच्या सणासाठी भारतामध्ये आणि आपल्या घरी येणे शक्य होत नाही. ही बाब लक्षात घेऊन जगभरातील प्रियजनांना फराळाचे पदार्थ आणि भेटवस्तू पाठवून त्यांचा दिवाळीचा आनंद द्विगुणित करण्यासाठी बारामती टपाल विभागाने हे पार्सल परदेशात पोहोचविण्याची सुविधा दिली आहे.
या सेवेचा लाभ अधिकाधिक नागरिकांनी घ्यावा. अधिक माहितीसाठी ९०९६५४४९९९ , ९९६०५८८६९९, ८००७७९७५९५, ७५८८२३०२७०, ९१३०९६२८२७ या क्रमांकावर सकाळी ९ ते संध्याकाळी ७ या वेळेत संपर्क साधावा, असे आवाहन बारामती विभागाचे डाक अधीक्षक केतन शित्रे यांनी केले आहे.
