पुण्यात आरोपीला अटक, तिघे अल्पवयीन ताब्यात
marathinews24.com
पुणे – गाडी पार्किंगच्या वादातून शिवीगाळ केल्यामुळे टोळक्याने जीम मालक तरूणावर गोळ्या झाडून कोयत्याने हल्ला केल्याची घटना बुधवारी (दि.१०) सहकारनगरातील तळजाई डोंगर परिसरात घडली आहे. सुदैवाने गोळीबारातून तरुण बचावला असून, त्याच्यावर उपचार सुरू आहेत. आदित्य विष्णू थोपटे (वय २१ रा. जनता वसाहत) याला सहकारनगर पोलिसांनी अटक केली असून, तिघा अल्पवयीनांना ताब्यात घेतले आहे. योगेश बनेकर (वय ३४, रा. धनकवडी) असे जखमी झालेल्या तरुणाचे नाव आहे.
प्रवासात महिलांच्या दागिन्यांवर डल्ला – सविस्तर बातमी
योगेश बनेकर याची बिबवेवाडी परिसरात जीम असून ते ट्रेनर आहेत. आरोपी थोपटे आणि योगेश यांची तीन महिन्यांपुर्वी गाडी पार्क करण्यावरून वादविवाद झाले होते. तेव्हा योगेशने आरोपीला शिवीगाळ केली होती. त्याचा राग आरोपींच्या मनात होता. त्याच रागातून टोळक्याने योगेश बुधवारी रात्री जीम बंद करून घरी निघाले होते. त्यावेळी तळजाई डोंगर येथील बिकानेर चौकात ते फळे घेण्यासाठी रस्त्यात थांबले. गाडी लावत असतानाच पाठिमागून आलेल्या चौघा आरोपींनी त्यांच्या दिशेने गोळी झाडली. ही गोळी योगेशच्या मानेला चाटून गेली. गोळीचा आवाज येताच नागरिकांमध्ये खळबळ उडाली. योगेशने तेथून पळ काढला.
असा घडला गोळीबार थरार
चारही आरोपींनी त्याच्यामागे धावत पुन्हा दुसरी गोळी झाडली. गोळी चुकल्यानंतर योगेश उलट्या दिशेने पळाला. त्यानंतर एकाने त्याच्यावर कोयत्याने हल्ला केला. त्यात डोक्यात कोयता लागला. त्यानंतर आरोपींनी तिसरी गोळी झाडली. मात्र, सुदैवाने तिसरी गोळी चुकली गेली. कोयत्यानेच्या हल्यात योगेश गंभीररित्या जखमी झाला. पसार झालेल्या आरोपींचा माग काढत काही तासात आरोपींना जेरबंद केले. दरम्यान, आरोपी हा तळजाई वसाहत परिसरात राहायला असून, त्यांच्यावर यापुर्वीचे गुन्हे नोंद आहेत.
