दीड लाखांच्या ११ मोबाईल जप्त
marathinews24.com
पुणे – शहरातील कोंढवा परिसरात मोबाईल चोरी करून त्यांची विक्री करणाऱ्या सराईत चोरट्याला कोंढवा पोलिसांनी अटक केली आहे. त्याच्याकडून तब्बल ११ मोबाईल फोन जप्त करण्यात आले असून, त्यांची किंमत सुमारे दीड लाख रुपये आहे. या कारवाईमुळे मोबाईल चोरीचे अनेक गुन्हे उघडकीस आले आहेत. उमर सलीम शेख (वय २१, रा. शिवनेरीनगर, कोंढवा) असे अटक करण्यात आलेल्या आरोपीचे नाव आहे. त्याच्याविरुद्ध कोंढवा पोलिस ठाण्यात मोबाईल चोरीचे गुन्हे दाखल आहेत.
शिवीगाळ केल्याने झाडल्या गोळ्या, जीम मालक जखमी – सविस्तर बातमी
पोलिसांनी दिलेल्या माहितीनुसार, दि. २७ एप्रिल २०२६ रोजी कोंढवा परिसरातील एका नागरिकाचा मोबाईल फोन चोरीला गेला होता. याप्रकरणी कोंढवा पोलिस ठाण्यात गुन्हा दाखल करण्यात आला होता. या गुन्ह्याचा तपास सुरू असताना तपास पथकातील पोलिस अंमलदारांना त्यांच्या बातमीदारामार्फत माहिती मिळाली की, शिवनेरीनगर परिसरातील एक तरुण चोरीचे मोबाईल विक्रीसाठी ग्राहक शोधत आहे.
मिळालेल्या माहितीच्या आधारे पोलिसांनी तातडीने सापळा रचून उमर शेख याला ताब्यात घेऊन त्याची झडती घेतली असता त्याच्याकडे चोरीचा मोबाईल आढळून आला. अधिक चौकशी केली असता त्याने विविध ठिकाणांहून मोबाईल चोरी केल्याची कबुली दिली. तपासादरम्यान आरोपीकडून एकूण ११ मोबाईल फोन जप्त करण्यात आले. ही कारवाई वरिष्ठ पोलिस निरीक्षक संतोष खेतमाळस, पोलिस निरीक्षक (गुन्हे) प्रशांत मंडले यांच्या सूचनेनुसार उपनिरीक्षक रविंद्र गावडे यांच्यासह पोलिस अंमलदार रविंद्र चिप्पा, अमोल हिरवे, सचिन कोकरे, पुष्पेंद्र चव्हाण, केशव हिरवे, प्रशांत खाडे, संतोष बनसोडे, सूरज शुक्ला, अमित सूर्यवंशी, रियाज पटेल यांच्या पथकाने केली.
