व्हॉट्सॲपवर बनावट फाइल पाठवून बँक खात्यातून रक्कम लंपास
marathinews24.com
पुणे – Life Certificate Scam : बँक ऑफ इंडिया लाइफ सर्टिफिकेटची बनावट फाइल व्हॉट्सॲपवर पाठवून आणि त्यावर विश्वास संपादन करून सायबर चोरट्यांनी हवाई दलाच्या निवृत्त अधिकाऱ्याची ४ लाख ५० हजार रुपयांची आर्थिक फसवणूक केली. याप्रकरणी कोंढवा पोलिस ठाण्यात गुन्हा दाखल करण्यात आला आहे. प्रकाश सदानंद कलावर (वय ४८, रा. कोंढवा खुर्द) असे फसवणूक झालेल्या निवृत्त हवाई दल अधिकाऱ्याचे नाव आहे. याप्रकरणी त्यांनी पोलिसांकडे तक्रार दिली आहे.
बनावट पास बनवून बसमधून केला प्रवास; तरुणावर गुन्हा दाखल – सविस्तर बातमी
पोलिसांनी दिलेल्या माहितीनुसार, आरोपींनी फिर्यादी यांच्याशी संपर्क साधून त्यांना व्हॉट्स ॲपवर ‘बँक ऑफ इंडिया लाइफ सर्टिफिकेट’ची बनावट फाइल पाठवली. फाइलच्या माध्यमातून फिर्यादींचा विश्वास संपादन करण्यात आला. (Life Certificate Scam) त्यानंतर त्यांच्या बँक खात्यातील ४ लाख ५० हजार रुपये परस्पर ऑनलाइन हस्तांतरित करून त्यांची आर्थिक फसवणूक करण्यात आली.
याप्रकरणात बँक ऑफ इंडिया, कोलकाता येथील खात्याचा वापर झाल्याचे तक्रारीत नमूद आहे. खातेधारक म्हणून अशोक मुखर्जी यांचे नाव नोंदवण्यात आले आहे. या प्रकरणी कोंढवा पोलिसांनी भारतीय न्याय संहितेच्या विविध कलमांसह माहिती तंत्रज्ञान कायद्यातील कलम ६६(ड) नुसार गुन्हा दाखल केला आहे. याप्रकरणाचा पुढील तपास पोलिस उपनिरीक्षक शेलार करत आहेत.
