गुन्हे शाखेच्या युनिट दोनकडून आरोपींना अटक
marathinews24.com
पुणे – वैमनस्यातून तरुणाचा खून करुन पसार झालेल्या दोघांना गुन्हे शाखेने अटक केली. आरोपींबरोबर असलेल्या दोन अल्पवयीनांना पोलिसांनी ताब्यात घेतले. सुजीत सोमनाथ धुतावळे (वय १९), आशिष राजू सोनवणे (वय १९, दोघे रा. समर्थनगर, हिंगणे खुर्द, सिंहगड रस्ता) अशी अटक केलेल्यांची नावे आहेत. आरोपींबरोबर असलेल्या दोन अल्पवयीन साथीदारांना ताब्यात घेण्यात आले आहे.
नदीपात्रात अडकलेला तरुण बचावला – सविस्तर बातमी
लोकशाहीर अण्णाभाऊ साठे जयंतीनिमित्त १ ऑगस्ट रोजी रात्री काढण्यात आलेली मिरवणूक पाहून शुभम राजू घोडके (वय २२) आणि त्याचा मेहुणा विष्णू शिवाजी शिरसाठ (वय २२) हे रिक्षातून सिंहगड रस्ता परिसरातून निघाले होते. पानमळा परिसरात आरोपींनी सुजीत याला लाथाबुक्क्यांनी मारहाण केली. मारहाणीत गंभीर जखमी झालेल्या शुभमचा रुग्णालयात मृत्यू झाला. त्यानंतर त्याच्या मेहुण्याने पर्वती पोलीस ठाण्यात फिर्याद दिली होती.
या प्रकरणाचा गुन्हे शाखेच्या युनिट दोनकडून तपास करण्यात येत होता. पसार झालेले आरोपी सिंहगड रस्ता, तसेच पद्मावती परिसरात फिरत असल्याची माहिती पोलीस कर्मचारी उज्ज्वल मोकाशी, शिवानंद कायगुडे, महेश मंडलिक, संदीप शिर्के यांना मिळाली. त्यानंतर पोलिसांनी सापळा लावून पसार आरोपी धुतावळे, सोनवणे यांच्यासह दोन अल्पवयीनांना ताब्यात घेतले. पुढील कायदेशीर कार्यवाहीसाठी आरोपींना पर्वती पोलिसांच्या ताब्यात देण्यात आले आहे. अतिरिक्त पोलीस आयुक्त तेजस्वी सातपुते, उपायुक्त गौहर हसन, सहायक आयुक्त शैलेश संखे यांच्या मार्गदर्शनाखाली वरिष्ठ पोलीस निरीक्षक राहुलकुमार खिलारे, उपनिरीक्षक ज्ञानेश्वर दळवी, शंकर नेवसे, विनोद चव्हाण, कुंदन शिंदे, आशिष यादव, शंकर कुंभार, विजय पवार, साधना ताम्हाणे यांनी ही कारवाई केली.
