संगमवाडी येथील प्रवासी बस थांब्यावर घडली घटना
marathinews24.com
पुणे – प्रवासी वाहतूक करणाऱ्या खासगी आराम बसच्या धडकेत पादचाऱ्याचा मृत्यू झाल्याची घटना संगमवाडी येथील प्रवासी बस थांब्यावर घडली. या प्रकरणी प्रवासी बस चालकाविरुद्ध पोलिसांनी गुन्हा दाखल केला. रज्जू निषाद (वय ३९, रा. छत्तीसगड) असे मृत्युमुखी पडलेल्या पादचाऱ्याचे नाव आहे. याबाबत बुधारु रामजी निषाद (वय ३५, सध्या रा. हिंजवडी) यांनी लक्ष्मीनगर पोलीस ठाण्यात फिर्याद दिली आहे.
मित्राला व्हिडीओ पाठवत तरूणाची आत्महत्या – सविस्तर बातमी
पोलिसांनी दिलेल्या माहितीनुसार, फिर्यादी निषाद यांचा भाऊ रज्जू हे संगमवाडी परिसरातून २३ मार्च रोजी सायंकाळी सहाच्या सुमारास निघाले होते. त्या वेळी प्रवासी वाहतूक करणाऱ्या आराम बसच्या थांब्याजवळ एक बसने रज्जू निषाद यांना धडक दिली. बसच्या धडकेत ते गंभीर जखमी झाले. अपघातानंतर घटनास्थळी न थांबता बस चालक पसार झाला. गंभीर जखमी झालेल्या निषाद यांचा उपचारांपूर्वीच मृत्यू झाला होता.
अपघातानंतर पसार झालेल्या बस चालकाविरुद्ध गुन्हा दाखल करण्यात आला आहे. सहायक पोलीस निरीक्षक विभुते तपास करत आहेत. संगमवाडी परिसरात प्रवासी वाहतूक करणाऱ्या वाहतूकदारांचे (ट्रॅव्हल्स) थांबे आहेत. संगमवाडी ते येरवडा रस्त्यावर यापूर्वी प्रवासी बसच्या धडकेत पादचारी, दुचाकीस्वारांचा मृत्यू होण्याच्या घटना घडल्या आहेत.
