पुण्यातील खलील शेख आत्महत्या प्रकरणी अखेर गुन्हा दाखल
marathinews24.com
पुणे – गुलटेकडी येथील खलील रज्जुलाल शेख (वय ५६) यांच्या आत्महत्या प्रकरणी अखेर स्वारगेट पोलिसांनी माजी आमदार रवींद्र धंगेकर यांच्यासह १४ जणांविरोधात गुन्हा दाखल केला आहे. या प्रकरणी मृताची पत्नी सुलताना खलील शेख (रा. गुलटेकडी डायस प्लॉट, नुराणी मशिदीजवळ, पुणे) यांनी फिर्याद दिली आहे.
अमली पदार्थांविरोधातील लढ्यात युवकांनी पुढे यावे- पोलिस आयुक्त अमितेश कुमार – सविस्तर बातमी
पोलिसांनी या प्रकरणात भारतीय न्याय संहिता कलम १०८, ३५१(२), ३५२ आणि ३(५) अन्वये गुन्हा नोंदविला आहे. फिर्यादीनुसार, २०१५ पासून १५ जुलै २०२६ पर्यंत आरोपींनी स्टेरिंग व्यवसायातील आर्थिक व्यवहारांवरून खलील शेख व त्यांच्या पत्नीला सातत्याने धमक्या देणे, शिवीगाळ करणे आणि मानसिक त्रास दिल्याचा आरोप आहे.
गुन्ह्यात विशाल केवतरी, सुनील अय्यर, त्यांचा मुलगा, रघु गोडा, सुनील बोरा, राजन सेठिया, हमीदभाई शेख व त्यांचा मुलगा, बाबासाहेब शेडगे व त्यांची पत्नी, माजी आमदार रवींद्र धंगेकर व त्यांची पत्नी, शाम कोळेकर तसेच शुभम नावाच्या व्यक्तीचा आरोपी म्हणून समावेश आहे.
फिर्यादीनुसार, आरोपी बाबासाहेब शेडगे यांनी खलील शेख यांचे स्टेरिंगचे साहित्य जबरदस्तीने नेले होते. या सर्व प्रकारामुळे खलील शेख प्रचंड मानसिक तणावाखाली होते. त्यांनी आत्महत्येपूर्वी चिठ्ठी आणि व्हिडीओ तयार करून संबंधित आरोपींना जबाबदार धरल्याचा उल्लेख फिर्यादीत आहे. त्यानंतर १५ जुलै रोजी त्यांनी राहत्या घरी सिलिंग फॅनला दोरीच्या सहाय्याने गळफास घेऊन आत्महत्या केल्याचे पोलिसांनी नमूद केले आहे. या प्रकरणाचा पुढील तपास पोलीस निरीक्षक प्रदीपसिंह सिसोदे करीत आहेत.
