गांजा बाळगल्याप्रकरणी गुन्हा दाखल
marathinews24.com
पुणे – न्यायालयीन कामकाजासाठी कारागृहाबाहेर आलेल्या बंदीवानाने पुन्हा आतमध्ये जाताना गांजा बाळगले असल्याचे अंगझडतीत उघडकीस आले आहे. संबंधित आरोपीने काही महिन्यांपुर्वी सहायक पोलीस निरीक्षकावर कोयत्याने वार करून गंभीररित्या जखमी केले होते. दरम्यान, त्याच्याविरूद्ध एनडीपीएस कलमानुसार येरवडा पोलीस ठाण्यात गुन्हा दाखले कला आहे. निहालसिंग मुन्नसिंग टाक (वय २१ , रा. हडपसर) असे गुन्हा दाखल केलेल्याचे नाव आहे. (Pune Crime) कारागृह पोलीस शिपाई समाधान हत्तीकर यांनी फिर्याद दाखल केली आहे.
बालरोग तज्ज्ञांची ‘ऑनलाइन अपाॅईंटमेट’ महागात – सविस्तर बातमी
पोलिसांनी दिलेल्या माहितीनुसार, आरोपी निहालसिंग टाक याने वानवडी पोलीस ठाण्याच्या हद्दीत सहायक पोलीस निरीक्षकावर कोयत्याने वार केला होता. दरम्यान, काही महिन्यांपासून तो येरवडा कारागृहात बंदीवान आहे. १८ जुलैला त्याला न्यायालयीन कामकाजासाठी कारागृहातून बाहेर काढण्यात आले होते. कामकाज संपल्यानंतर तो दुपारी पावणेदोनच्या सुमारास पुन्हा येरवडा कारागृहात दाखल झाला. त्यावेळी अमली पदार्थाचा संशय आल्यामुळे कारागृह शिपायाने झडती घेतली. त्यावेळी त्याच्याकडे ५०० रूपयांचा १२ ग्रॅम गांजा मिळून आला. याप्रकरणी वरिष्ठ पोलीस निरीक्षक अंजुम बागवान, पोलीस निरीक्षक केशव दिंडे, उपनिरीक्षक किशोर बेरड, उपनिरीक्षक महेश भोसले यांनी घटनास्थळी भेट दिली.
