कर्ज फेडण्यासाठी नोकराने लुटमारीचा कट रचल्याचे उघड
marathinews24.com
पुणे – गुलटेकडीतील एका सोसायटीच्या आवारात व्यावसायिकाकडील साडेसहा लाख रुपयांची रोकड लुटून पसार झालेल्या स्वारगेट पोलिसांनी अटक केली. कर्जबाजारी झाल्याने व्यावसायिकाकडे काम करणाऱ्या कामगाराने जावयाशी संगनमत करुन रोकड लुटल्याचे तपासात निष्पन्न झाले आहे. याप्रकरणी जयंत रजनीकांत शहा (वय ५९), सोहेल अलीअहमद खान (वय ३५) , तौसीफ मुकीद बागवान (वय ३०) यांना अटक करण्यात आली. याबाबत एका व्यावसायिकाने स्वारगेट पोलीस ठाण्यात फिर्याद दिली होती.
पोलीस इन्स्पेक्टर बोलत असल्याची बतावणी- सविस्तर बातमी
तक्रारदार व्यावसायिक हे गुलटेकडीतील एका सोसायटीत राहायला आहेत. ९ जुलै रोजी ते रात्री आठच्या सुमारास घरी आले. सोसायटीच्या प्रवेशद्वारावर ते पोहोचले. तेव्हा त्यांनी रोकड असलेली पिशवी रखवालदाराकडे ठेवण्यास दिली. व्यावसायिक आणि रखवालदार सोसायटीच्या आवारातून निघाले. तेव्हा त्यांच्या मागावर असलेल्या चोरट्यांनी साडेसहा लाख रुपयांची रोकड असलेली पिशवी हिसकावून नेली होती. काही अंतरावर लावलेल्या दुचाकीवरुन चोरटे पसार झाले.
स्वारगेट पोलिसांनी घटनास्थळी भेट दिली. त्यानंतर पोलिसांनी सीसीटीव्ही चित्रीकरण तपासले. १५० ते १६०० ठिकाणचे सीसीटीव्ही चित्रीकरण तपासून चोरट्यांचा माग काढण्यात आला. आरोपी शहा हा तक्रारदार व्यावसायिकाकडे कामाला होता. शहाने कर्ज घेतले होते. कर्जबाजारी झाल्यानंतर शहा यांनी जावई सोहेल आणि त्याचा मित्र तौसीफ याला हाताशी धरून रोकड लुटण्याचा कट रचल्याचे तपासात निष्पन्न झाले. परिमंडळ दोनचे पोलीस उपायुक्त मिलिंद मोहिते यांच्या मार्गदर्शनाखाली वरिष्ठ पोलीस निरीक्षक यशवंत निकम, हवालदार नाना भांदुर्गे, सागर केकाण, सुजय पवार, अश्रुबा मोराळे, हर्षल शिंदे, प्रशांत टोणपे, सागर काळे, संग्राम शिंदे, रमेश चव्हाण, अनिता घायतडक यांनी ही कामगिरी केली.
