३१ जुलै रोजी सन्मानपूर्वक सेवानिवृत्तीनंतर गावातून भव्य मिरवणूक; मान्यवरांच्या उपस्थितीत देशसेवेचा गौरव
marathinews24.com
पुणे – नेरे गावचे सुपुत्र सागर नारायण भरगुडे यांनी केंद्रीय राखीव पोलीस दल (CRPF) मध्ये तब्बल २२ वर्षे देशसेवा बजावून ३१ जुलै २०२६ रोजी सन्मानपूर्वक सेवानिवृत्ती स्वीकारली. त्यांच्या गौरवशाली सेवेला सलाम करत २ ऑगस्ट २०२६ रोजी भरगुडे कुटुंबीय आणि नेरे गावातील ग्रामस्थांच्या वतीने त्यांची गावातून भव्य मिरवणूक काढून जंगी स्वागतही करण्यात आले. त्यानंतर आयोजित सन्मान सोहळ्यात त्यांचा शाल, श्रीफळ व स्मृतिचिन्ह देऊन गौरव करण्यात आला.
सागर भरगुडे यांनी ३ मार्च २००४ रोजी सीआरपीएफमध्ये प्रवेश केला. आसाम येथे त्यांचे प्रारंभिक प्रशिक्षण पूर्ण झाले. त्यानंतर पुढे त्यांनी जम्मू-काश्मीर, झारखंड, छत्तीसगड, पश्चिम बंगाल आणि गडचिरोलीसारख्या नक्षलग्रस्त व अतिसंवेदनशील भागांमध्ये अत्यंत धाडसाने व निष्ठेने कर्तव्य बजावत देशसेवा केली. त्यांच्या शिस्तबद्ध, प्रामाणिक आणि समर्पित सेवेमुळे त्यांनी आपल्या गावासह संपूर्ण परिसराचे नाव उज्ज्वल केले. सोबतच गावातील आजी-माजी सैनिकांचा देखील भरगुडे परिवारातर्फे सत्कार करण्यात आला.
या सत्कार समारंभाला भोर, वेल्हा, मुळशी मतदारसंघाचे माजी आमदार संग्रामदादा थोपटे. सामाजिक कार्यकर्ते अनिलनाना सावले. नेरे गावचे सरपंच विजय बढे, उपसरपंच ग्रामपंचायत सदस्य तसेच नेरे गावातील महिला पुरूष मोठ्या संख्येत उपस्थित होते.
उपस्थित मान्यवरांनी भरगुडे यांच्या देशसेवेचा गौरव करत त्यांच्या कार्याचा युवा पिढीने आदर्श घ्यावा, असे आवाहन केले. संपूर्ण गाव देशभक्तीच्या वातावरणात न्हाऊन निघाला असून सन्मान सोहळा मोठ्या उत्साहात आणि जल्लोषात पार पडला. कार्यक्रमाचे सूत्रसंचालन नेरे गावचे तंटामुक्ती अध्यक्ष अंनदा बढे यांनी केले.
