सायबर चोरट्यांविरुद्ध डेक्कन पोलिसांनी केला गुन्हा दाखल
marathinews24.com
पुणे – बँक खात्यातून दहशतवादी कारवायांसाठी पैसै पाठविण्यात आल्याची बतावणी करुन सायबर चोरट्यांनी ज्येष्ठ नागरिकाची १९ लाख ४५ हजार रुपयांची फसवणूक केली. याप्रकरणी सायबर चोरट्यांविरुद्ध डेक्कन पोलिसांनी गुन्हा दाखल केला. याबाबत ज्येष्ठ नागरिक डेक्कन पोलीस ठाण्यात फिर्याद दिली आहे.
लोणी काळभोरमध्ये मोटारीच्या धडकेत ज्येष्ठाचा मृत्यू – सविस्तर बातमी
पोलिसांनी दिलेल्या माहितीनुसार, तक्रारदार ६४ वर्षीय ज्येष्ठ नागरिक हे चिंचवड परिसरात राहायला आहेत. ते निवृत्त शासकीय कर्मचारी असून, त्यांचे बँक खाते डेक्कन जिमखाना भागातील एका बँकेत आहे. सायबर चाेरट्यांनी त्यांच्या मोबाइलवर २९ जुलै रोजी संपर्क साधला आणि पोलीस असल्याची बतावणी केली. ’ तुमच्या बँक खात्याचा वापर दहशतवादी कारवायांसाठी झाला आहे. या प्रकरणात तुम्हाला डिजिटल ॲरेस्ट केली जाणार आहे.
अटक टाळण्यासाठी तातडीने पैसे भरावे लागतील’, अशी बतावणी चोरट्यांनी त्यांच्याकडे केली. त्यानंतर ज्येष्ठ नागरिकाने शहानिशा न करता चोरट्यांच्या खात्यात १९ लाख ४५ हजार रुपये जमा केले. फसवणूक झाल्याचे लक्षात आल्यानंतर त्यांनी पोलिसांकडे तक्रार दिली. गुन्हे शाखेच्या पोलीस निरीक्षक सपना देवताळे तपास करत आहेत.
स्वस्तात सहलीच्या आमिषाने फसवणूक
स्वस्तात सहलीचे आमिष दाखवून एका पर्यटन कंपनीच्या संचालकांनी एक लाख तीन हजार रुपयांची फसवणूक केल्याचा प्रकार उघडकीस आला आहे. या प्रकरणी पर्यटन कंपनीच्या संचालक रेखा वैष्णव यांच्याविरुद्ध गुन्हा दाखल करण्यात आला आहे. याबाबत एकाने डेक्कन पोलीस ठाण्यात फिर्याद दिली आहे.
जंगली महाराज रस्त्यावर निमा हाॅलिडेज या पर्यटन कंपनीचे कार्यालय आहे. पर्यटन कंपनीच्या संचालकाने तक्रारदाराला स्वस्तात सहलीचे आमिष दाखविले होते. तक्रारदाराकडून एक लाख तीन हजार रुपये जमा करुन घेण्यात आले. सहलीचे आयाेजन करण्यात आले नाही. फसवणूक झाल्याचे लक्षात आल्यानंतर पोलिसांकडे तक्रार देण्यात आली. सहायक पोलीस निरीक्षक बाळासाहेब अंतरकर तपास करत आहेत.
