चोरट्यांविरुद्ध गुन्हा दाखल
marathinews24.com
पुणे – पोलीस असल्याची बतावणी करुन ज्येष्ठ नागरिकाला लुटण्यात आल्याची घटना पुणे-सोलापूर रस्त्यावरील शेवाळवाडी परिसरात घडली. ज्येष्ठाकडील सोन्याची अंगठी, सोनसाखळी असा तीन लाख ४० हजार रुपयांचा ऐवज चोरुन चोरटे पसार झाले. याबाबत एका ज्येष्ठ नागरिकाने मांजरी पोलीस ठाण्यात फिर्याद दिली आहे. त्यांनी दिलेल्या फिर्यादीनुसार, दोन चोरट्यांविरुद्ध गु्न्हा दाखल करण्यात आला आहे.
पत्नीच्या त्रासामुळे एकाची आत्महत्या – सविस्तर बातमी
पोलिसांनी दिलेल्या माहितीनुसार, तक्रारदार ७१ वर्षीय ज्येष्ठ नागरिक हे मांजरी भागात राहायला आहेत. ते १४ जून रोजी दुपारी साडेबाराच्या सुमारास शेवाळवाडी परिसरातून निघाले होते. पुरातन महादेव मंदिराजवळ दोन चोरट्यांनी त्यांना अडविले. पोलीस असल्याची बतावणी त्यांच्याकडे केली. चोरट्यांनी त्यांना बनावट ओळखपत्र दाखविले. या भागात ज्येष्ठ नागरिकांना लुटण्याच्या घटना घडल्या अहोत. तुमच्याकडील दागिने काढून ठेवा, अशी बतावणी केली. त्यानंतर ज्येष्ठ नागरिकाला बोलण्यात गुंतवून चोरट्यांनी सोन्याच्या दोन अंगठ्या, तसेच सोनसाखळी असा तीन लाख ४० हजार रुपयांचा ऐवज लांबवून चोरटे पसार झाले. पोलीस उपनिरीक्षक बालाजी डिगोळे तपास करत आहेत.
