नर्हे, खराडीत केली घरफोडी
marathinews24.com
पुणे – घराचे दरवाजे उघडे असल्याची संधी साधून चोरट्यांनी चोरी केली आहे. शहरातील नर्हे आणि खराडी परिसरातील इमारतीत शिरून चोरट्यांनी रोकडसह सोन्या-चांदीचे दागिने चोरून नेले आहेत. याप्रकरणी सिंहगड रस्ता आणि खराडी पोलीस ठाण्यात स्वतंत्र गुन्हे दाखल करण्यात आले आहेत.
नर्हेत दरवाजा उघडा असल्याची संधी साधून चोरट्यांनी ४७ हजार ५०० रूपयांचे सोन्याचे दागिने चोरून नेले. ही घटना १९ सप्टेंबरला नर्हेतील भक्ती राधिका अपार्टमेंटमध्ये घडली आहे. याप्रकरणी एकाने सिंहगड रस्ता पोलीस ठाण्यात फिर्याद दाखल केली आहे. त्यानुसार पोलिसांनी अज्ञात चोरट्यांविरूद्ध गुन्हा दाखल केला आहे. आजूबाजूचे सीसीटीव्ही फुटेज पाहून चोरट्यांचा माग काढला जात असल्याची माहिती पोलिसांनी दिली. याप्रकरणी पोलीस अमलदार तारू तपास करीत आहेत.
खराडीतील थिटे वस्तीवरील कृपा इमारतीत एका घराचा उघडा असल्याचे पाहून चोरट्यांनी आतमध्ये प्रवेश केला. घरातील डब्यातील १८ हजारांची रोकड आणि सोन्या-चांदीचे दागिने असा ९९ हजारांचा ऐवज चोरून नेला आहे. याप्रकरणी महिलेने खराडी पोलीस ठाण्यात फिर्याद दाखल केली आहे. त्यानुसार अज्ञात चोरट्याविरूद्ध गुन्हा दाखल करण्यात आला आहे. पोलीस अमलदार बुधवंत तपास करीत आहेत.
