गुन्हे शाखेच्या युनिट तीनने केली अटक
marathinews24.com
पुणे – गंभीर गुन्ह्यातील फरार आरोपीसह दोघांना गुन्हे शाखेच्या युनिट तीनने अटक केली आहे. त्यांच्या अल्पवयीन साथीदाराला ताब्यात घेण्यात आले आहे. आरोपींकडून तीन गावठी पिस्टल व चार जिवंत काडतुसे असा मिळून १ लाख ८१ हजारांचा शस्त्रसाठा जप्त केला आहे. शुभम साधू चव्हाण (वय २०, रा. त्रियाग सोसायटी, आंबेगाव बुद्रुक) आणि शुभम सतीश डोके (वय १९, रा. मेमाणे सोसायटी, नऱ्हे गाव) अशी अटक केलेल्या आरोपींची नावे आहेत.
विमाननगर येथील हॉटेलमध्ये आग; अनुचित प्रकार नाही – सविस्तर बातमी
गुन्हे शाखेचे युनिट तीन ४ ऑगस्टला हद्दीत पेट्रोलिंग करत होते. त्यावेळी पोलीस अंमलदार किशोर शिंदे, पुरुषोत्तम गुन्ला आणि योगेश झेंडे यांना नऱ्हे पोलीस ठाण्याच्या हद्दीत गंभीर गुन्ह्यातील आरोपींची माहिती मिळाली. त्यानुसार पथकाने सापळा रचून एका अल्पवयीन मुलाला ताब्यात घेतले. त्याच्या दोन साथीदाराला ताब्यात घेत अंगझडती घेतली. झडतीत ३ गावठी पिस्टले, ३ मॅगझीन, ४ जिवंत काडतुसे, आयफोन मोबाईल, दुचाकी असा १ लाख ८१ हजार १०० रुपयांचा मुद्देमाल जप्त केला.
तिन्ही आरोपींना नऱ्हे पोलीस ठाण्याच्या ताब्यात देण्यात आले आहे. ही कारवाई पोलीस उपायुक्त गौहर हसन, एसीपी शैलेश संख्ये यांच्या मार्गदर्शनाखाली पोलीस निरीक्षक प्रशांत अन्नछत्रे, सहाय्यक पोलीस निरीक्षक नानासाहेब कदम, सहाय्यक पोलीस उपनिरीक्षक पंढरीनाथ शिंदे, पोलीस अंमलदार किशोर शिंदे, कैलास लिम्हण, अतुल साठे, अमोल काटकर, पुरुषोत्तम गुन्ला, योगेश झेंडे, तुषार किंद्रे यांनी केली.
