पती अटकेत; सासूसह दीराविरुद्ध गुन्हा
marathinews24.com
पुणे – हुंड्यासाठी छळ केल्याने महिलेने गळफास घेऊन आत्महत्या केल्याची घटना हडपसमधील फुरसुंगी भागात घडली. महिलेचा शारिरिक आणि मानसिक छळ करुन तिला आत्महत्येस प्रवृत्त केल्याच्या आरोपावरुन पतीला अटक करण्यात आली असून, सासूसह दीराविरुद्ध गुन्हा दाखल करण्यात आला आहे. विद्या अमोल तेलंग (वय २५, रा. पापडे वस्ती, फुरसुंगी, हडपसर) असे आत्महत्या केलेल्या महिलेचे नाव आहे. तिला आत्महत्येस प्रवृत्त केल्याच्या आरोपावरुन अमोल ज्ञानोबा तेलंग (वय २८, रा. पापडे वस्ती, फुरसुंगी, हडपसर) याला अटक करण्यात आली. याप्रकरणी सासू, तसेच दीराविरुद्ध गुन्हा दाखल करण्यात आला आहे. संभाजी वडनमवार (वय ५५, रा. इस्लामपूर, ता. किनवट, जि. नांदेड) यांनी फुरसुंगी पोलीस ठाण्यात फिर्याद दिली आहे.
लष्कराच्या दक्षिण मुख्यालयातील लेखापरीक्षकासह ठेकेदाराविरुद्ध गुन्हा – सविस्तर बातमी
पोलिसांनी दिलेल्या माहितीनुसार, विद्या हिचा मे महिन्यात अमोल याच्याशी विवा झाला होता. विवाहानंतर माहेरहून दागिने, तसेच पैसे घेऊन येण्याची मागणी विद्याकडे करण्यात आली. पती, सासू, दीराने तिचा शारिरिक आणि मानसिक छळ केला. छळ असह्य झाल्याने तिने ९ ऑगस्ट रोजी राहत्या घरात गळफास घेऊन आत्महत्या केली. या घटनेनंतर तिच्या वडिलांनी पोलिसांकडे नुकतीच फिर्याद दिली. हुंड्यासाठी छळ केल्याने मुलीने आत्महत्या केल्याचे वडील संभाजी वडनमवार यांनी फिर्यादीत म्हटले आहे.
