पोलिसांनी पतीला केली अटकेत
marathinews24.com
पुणे – चारित्र्याच्या संशय घेऊन पतीने बेदम मारहाण करुन महिलेचा खून केल्याची घटना बिबवेवाडीतील अप्पर इंदिरानगर भागात घडली. याप्रकरणी पोलिसांनी पतीला अटक केली. सारिका शुभम घोडके (वय २३, रा. अंबिकानगर, अप्पर इंदिरानगर, बिबवेवाडी) असे खून झालेल्या महिलेचे नाव आहे. पती शुभम श्रीकांत घोडके (वय २९) याला अटक करण्यात आली आहे. सारिकाची आई गेणीबाई रुपसिंग चव्हाण (वय ५०, रा. अंबिकानगर, अप्पर इंदिरानगर) यांनी बिबवेवाडी पोलीस ठाण्यात फिर्याद दिली आहे.
श्रीरामनवमीनिमित्त बाजीराव रस्ता, लष्कर भागात वाहतूक बदल – सविस्तर बातमी
पोलिसांनी दिलेल्या माहितीनुसार, आरोपी शुभम हा अप्पर इंदिरनगर परिसरातील अंबिकानगर भागात राहायला आहे. आरोपी पत्नी सारिकाच्या चारित्र्याचा संशय घेऊन तिचा छळ करायचा. २४ मार्च रोजी दुपारी चारच्या सुमारास आरोपी पतीने सारिकाला कठीण वस्तुने मारहाण केली. मारहाणीत ती गंभीर जखमी झाली. शेजाऱ्यांनी तिला तातडीने खासगी रुग्णालयात दाखल केले. उपचारादरम्यान तिचा मृत्यू झाला. कठीण वस्तूने मारहाण केल्याने ती गंभीर जखमी झाल्याने तिचा मृत्यू झाल्याचे डाॅक्टरांनी सांगितले. पसार झालेला आरोपी पती शुभम याला पोलिसांनी अटक केली असून, वरिष्ठ पोलीस निरीक्षक अश्विनी सातपुते तपास करत आहेत.
