अहिल्यानगर रस्त्यावरील घटना
marathinews24.com
पुणे – अपघातानंतर उपचारासाठी रुग्णालयात दाखल करण्याचा बहाणा करुन तरुणीच्या गळ्यातील सोनसाखळी चोरट्यांनी लांबविल्याची घटना खराडी परिसरात घडली. याप्रकरणी चोरट्याविरुद्ध गुन्हा दाखल करण्यात आला. याबाबत एका तरुणीने खराडी पोलीस ठाण्यात फिर्याद दिली आहे.
पोलीस असल्याची बतावणी करुन ज्येष्ठाला लुटले – सविस्तर बातमी
पोलिसांनी दिलेल्या माहितीनुसार, तक्रारदार २२ वर्षीय तरुणी वाघोलीतील केसनंद फाटा परिसरात राहायला आहे. मंगळवारी (५ मे) सकाळी नऊच्या सुमारास तक्रारदार तरुणी आणि तिची आई दुचाकीवरुन खराडी परिसरातून निघाल्या हाेती. खराडी परिसरात दुचाकी घसरल्याने दुचाकीस्वार तरुणी आणि तिच्या आईला दुखापत झाली. त्यावेळी तेथून निघालेल्या एका चोरट्याने तरुणी आणि तिच्या आईला मदत करण्याचा बहाणा केला. प्रथमोपचार करण्यासाठी खराडीतील खासगी रुग्णालयात दाखल करतो, असे चोरट्याने सांगितले. चोरट्याने एक रिक्षा थांबविली. रिक्षा चालकाला एका खासगी रुग्णालयात रिक्षा नेण्यास सांगितले. चोरटा तरुणी आणि तिच्या आईसोबत रिक्षात होता.
तरुणीचे लक्ष नसल्याची संधी साधून त्याने तिच्या गळ्यातील ३० हजारांची सोनसाखळी लांबविली. तरुणी आणि तिच्या आईला रुग्णालयात दाखल केले. त्यानंतर त्यांचे लक्ष नसल्याची संधी साधून चोरटा पसार झाला. या घटनेची माहिती तरुणीने पोलिसांना दिली. वरिष्ठ पोलीस निरीक्षक संजय चव्हाण यांनी घटनास्थळी भेट दिली. पोलिसांनी परिसरातील सीसीटीव्ही चित्रीकरण तपासले असून, पसार झालेल्या चोरट्याचा शोध घेण्यात येत आहे. हवालदार खरपुडे तपास करत आहेत.
