तीर्थक्षेत्र विकासाला चालना देण्याचा निर्धार
marathinews24.com
नाशिक – विधान परिषद उपसभापती डॉ. नीलम गोऱ्हे यांनी नाशिक जिल्ह्यातील श्री क्षेत्र रेणुका देवी संस्थान, चांदवड येथे देवीचे दर्शन घेतले. या प्रसंगी त्यांच्या भगिनी जेहलम जोशी व कन्या रश्मी जोशी उपस्थित होत्या. डॉ. गोऱ्हे यांनी रेणुका मातेच्या चरणी राज्यातील जनतेच्या सुख-समृद्धीसाठी प्रार्थना केली.
विश्वाला हेवा वाटेल, अशी शिवजयंती साजरी करणार-अमित गायकवाड – सविस्तर बातमी
दर्शनानंतर त्यांनी मंदिर परिसरात असलेल्या पुण्यश्लोक अहिल्यादेवी होळकर यांच्या मूर्तीला पुष्पहार अर्पण करून अभिवादन केले. मंदिर परिसराची पाहणी करत त्यांनी भाविकांशी संवाद साधला. संस्थानच्या पदाधिकाऱ्यांनी त्यांचे स्वागत केले. यावेळी देवीला साडी, पुष्पहार व प्रसाद अर्पण करून ओटी भरत त्यांनी मनोभावे प्रार्थना केली.
यानंतर प्रसारमाध्यमांशी बोलताना डॉ. गोऱ्हे म्हणाल्या की, “रेणुका माता आमचे कुलदैवत असून लाखो भाविकांचे श्रद्धास्थान आहे. मंदिर परिसरातील विकासकामांसाठी सातत्याने मागणी होत होती. त्यानुसार माझ्या निधीतून ९ लाख रुपये देवस्थानाच्या विकासासाठी देण्यात आले आहेत. रंगमहालाचे काम सुरू झाले असून ते लवकर पूर्ण व्हावे, अशी अपेक्षा आहे.” त्या पुढे म्हणाल्या की, राज्यातील तीर्थक्षेत्रांचा विकास होऊन भाविकांना सुविधा मिळाव्यात आणि स्थानिकांना रोजगारनिर्मिती व्हावी, ही शासनाची भूमिका आहे.
सन्माननीय मुख्यमंत्री देवेंद्र फडणवीस, उपमुख्यमंत्री एकनाथ शिंदे यांनी नाशिकसह राज्याच्या विकासासाठी मोठ्या प्रमाणावर निधी दिला आहे. तसेच दिवंगत उपमुख्यमंत्री अजित पवार यांनीही अनेक मंदिरांच्या विकासासाठी योगदान दिले असल्याचे त्यांनी नमूद केले.
