पोलीस आयुक्त अमितेशकुमार यांचे आदेश
marathinews24.com
पुणे – तब्बल २८ लाख रुपयांच्या लाच प्रकरणात अटकेत असलेल्या सहायक पोलीस निरीक्षक वैशाली तोटेवार यांना पोलीस दलातून निलंबित करण्याचे आदेश पोलीस आयुक्त अमितेशकुमार यांनी दिले. तोटेवार यांची पदोन्नतीने मुंबई लोहमार्ग पोलीस दलात पोलीस निरीक्षक म्हणून बदली झाली होती. बदलीनंतर त्यांना पुणे पोलिसांच्या आर्थिक गुन्हे शाखेतून कार्यमुक्त करण्यात आले होते. तोटेवार यांना कार्यमुक्त करण्याचा आदेशही रद्द करण्यात आला.
आरोपीला फाशी मिळेपर्यंत कुटूंबियासोबत राहणार- पोलीस आयुक्त अमितेश कुमार – सविस्तर बातमी
तोटेवार यांना कार्यमुक्त करण्याचा आदेश रद्द करण्यात आला असून, सहायक पोलीस निरीक्षक पदावरुन त्यांना निलंबित करण्यात येणार आहे, अश माहिती आर्थिक गुन्हे शाखेतील पोलीस उपायुक्त विवेक मासाळ यांनी दिली. तोटेवार या आर्थिक गुन्हे शाखेत नियुक्तीस होत्या. जमिनीच्या एका प्रकणातील तक्रार अर्ज त्यांच्याकडे चौकशीसाठी सोपविण्यात आला होता. या प्रकरणात तोटेवार यांनी तक्रारदाराकडे ३० लाख रुपयांची लाच मागितली होती. तक्रारदाराने सुरुवातीला दोन लाख रुपये दिले होते. उर्वरित २८ लाख रुपयांची लाच देण्याची मागणी त्यांनी केली होती. लाचेची रक्कम घेऊन तक्रारदाराला शनिवारी (२ मे) दुपारी बंडगार्डन रस्त्यावरील पंचतारांकित हाॅटेलजवळ बोलाविले होते. ही रक्कम स्वीकारण्यासाठी तोटेवार यांनी संभाजी शिवाजी चव्हाण (वय ४७, रा. चिमण्या गणपती चौक, सदाशिव पेठ ) यांना पाठविले होते. चव्हाण हा तोटेवार यांच्या ओळखीचा आहे. तक्रारदाराकडून लाच घेताना चव्हाणला लाचलुचपत प्रतिबंधक विभागाने सापळा लावून पकडले.
चौकशीत तोटेवार यांनी लाच घेण्यासाठी पाठविल्याचे उघड झाल्यानंतर तोटेवार यांच्यासह चव्हाण याला अटक करण्यात आली. तोेटेवार आणि चव्हाण यांना न्यायालायने सहा मेपर्यंत पोलीस कोठडीत ठेवण्याचे आदेश दिले.
