महिलेच्या नावावर कर्ज घेऊन ‘आयफोन, टॅबची’ खरेदी; कोथरूडमध्ये गुन्हा दाखल
marathinews24.com
पुणे – हप्त्यावर मोबाईल खरेदी करताना महिलेने संबंधिताकडे दिलेल्या आधारकार्ड आणि पॅन कार्डची झेरॉक्सचा गैरवापर करून पीडितेच्या नावावर महागडे मोबाईल आणि टॅब्लेटची खरेदी करण्यात आली आहे. याप्रकरणी कोथरूड पोलिस ठाण्यात गुन्हा दाखल केला आहे. पीडित शशिकला विजय साळुंके (वय ३५ ) यांनी फिर्याद दाखल केली आहे. त्यानुसार दोन महिलांविरुद्ध गुन्हा दाखल करण्यात आला आहे.
कर्ज मिळवून देण्याच्या नावाखाली १० लाखाची फसवणूक – सविस्तर बातमी
पोलिसांनी दिलेल्या माहितीनुसार, शशिकला साळुंके पती आणि तीन मुलांसह कोथरूडच्या जयभवानी नगरमध्ये राहत आहे. ती मेट्रोमध्ये महिला सुरक्षा रक्षक आहे. जानेवारी २०२२ मध्ये तिने कोथरूडमधील विजय सेल्स इलेक्ट्रॉनिक दुकानातून ३१ हजार रुपयांनामोबाईल खरेदी केला. त्यावेळी तिने आयडीएफसी बँकेतून कर्ज घेतले. त्यानंतर ३ हजार ९९ रूपयांचे मासिक हप्ते वेळेवर भरले. मात्र, २ सप्टेंबर २०२२ रोजी शेवटचा हप्ता कापल्यानंतरही त्याच्या बँक खात्यातून २९५ रूपये, ३५४ आणि ११८ रुपये असे अतिरिक्त पैसे कापले जात होते.
शशिकलाने पंजाब नॅशनल बँकेकडे चौकशी केली असता, वजावट आयडीएफसी बँकेने केली आहे. त्यानंतर पीडितेने विजय सेल्सशी संपर्क साधत आयडीएफसी बँकेच्या कर्ज विभागातील कर्मचारी प्रतीक्षा चौरे यांच्याशी संपर्क साधला. आरोपी प्रतीक्षा चौरे हिने तक्रारदाराला सांगितले की त्याचे चेक बाउन्स झाले आहेत, त्यामुळे पैसे कापले जात आहेत. लवकरच पावती पाठवली जाणार असल्याचे सांगितले. परंतु काही दिवस उलटूनही पावती पाठवली नाही. त्यानंतर आरोपीने त्याच्याकडे आधार क्रमांक आणि ओटीपी (वन-टाइम पासवर्ड) मागितला. आरोपी महिलेने बँकेतच असून, कर्ज फेडत असल्याची बतावणी केली. तिच्यावर विश्वास ठेऊन पीडितेने ओटीपी सांगितला.
जानेवारी २०२३ पासून, पीडित महिलेला आयडीएफसी बँकेच्या ग्राहक कर्ज विभागाकडून वारंवार कॉल येऊ लागले, जरी तिने कोणतेही नवीन कर्ज घेतले नव्हते. जेव्हा ती पुन्हा बँकेत गेली तेव्हा तिच्या नावावर दोन नवीन कर्जे सक्रिय असल्याचे आढळून आले. ६६ हजार ३७४ रुपये किमतीचा आयफोन आणि ६७ हजार ७३९ रुपये किमतीचा अ‍ॅपल कंपनीचा टॅबलेट खरेदी केल्याचे उघड झाले. संबंधित वस्तू क्रोमा स्टोअर बाणेर आणि वाकड शाखेतून खरेदी केल्या गेल्या होत्या. त्यासाठी आयडीएफसी बँकेने कर्ज मंजूर केले होते. हे कर्ज मयूर धोंडिबा खोंड नावाच्या कर्मचार्‍याच्या लॉगिनवरून केले गेले होते.
आरोपी प्रतीक्षा चौरेने त्याच्या लॉगिनचा वापर करून पीडितेच्या नावावर कर्जे मंजूर केली. क्रोमा स्टोअरच्या व्यवस्थापकाने सीसीटीव्ही फुटेज दाखवले असता, ७ जानेवारी २०२३ रोजी रात्री साडेनउ वाजता अज्ञात महिला आयफोन खरेदी करताना दिसली. हे फुटेज पीडितेच्या पतीला व्हाट्सअ‍ॅपवर पा’वण्यात आले. वाकड शाखेत त्याच लॉगिनचा वापर करून आणखी डिव्हाइस खरेदी केले. पीडितेने पुन्हा प्रतीक्षाशी संपर्क साधला तेव्हा तिने शशिकला यांच्या नावाने मोबाईल आणि टॅबलेट खरेदी केल्याचे मान्य केले. विजय सेल्समध्ये सादर केलेल्या कागदपत्रांचा गैरवापर करून तिने १ लाख ३४ हजार रूपये किंमतीच्या वस्तू खरेदी केल्या.
त्यानुसार तान्या चौरेविरुद्ध कलम ४२० अंतर्गत गुन्हा दाखल करण्यात आला आहे. सहायक पोलीस निरीक्षक प्रेमा पाटील प्रकरणाचा तपास करत आहेत. आरोपी तान्याने इतर ग्राहकांच्या कागदपत्रांचा गैरवापर केला आहे का याचाही तपास केला जात आहे. सध्या प्रतीक्षा चौरे फरार असून पोलिस तिचा शोध घेत आहेत.
